ന്യൂഡല്‍ഹി: ഫലസ്തീന്‍ പ്രസിഡന്റ് മഹ്മൂദ് അബ്ബാസുമായി കൂടിക്കാഴ്ച നടത്തി പ്രധാനമന്ത്രി നരേന്ദ്ര മോദി. ഗസ്സയിലെ സാഹചര്യത്തില്‍ മോദി 'കടുത്ത ആശങ്ക' രേഖപ്പെടുത്തു. സമാധാനം പുനഃസ്ഥാപിക്കാന്‍ പൂര്‍ണ പിന്തുണയും ഇന്ത്യന്‍ പ്രധാനമന്ത്രി വാഗ്ദാനം ചെയ്തു. ദ്വിരാഷ്ട്രം മാത്രമാണ് മേഖലയില്‍ ശാശ്വതമായ ശാന്തിയും സമാധാനവും കൈവരിക്കാനുള്ള പരിഹാരമെന്നും മോദി വ്യക്തമാക്കി. 

''ഫലസ്തീന്‍ പ്രസിഡന്റ് മഹ്മൂദ് അബ്ബാസുമായി കൂടിക്കാഴ്ച നടത്തി. മേഖലയില്‍ സമാധാനം പുനഃസ്ഥാപിക്കുന്നതിന് ഇന്ത്യയുടെ പിന്തുണ ഉറപ്പ് നല്‍കി. ഫലസ്തീന്‍ ജനതയുമായുള്ള ദീര്‍ഘകാല സൗഹൃദം കൂടുതല്‍ ശക്തിപ്പെടുത്തുന്നതിനുള്ള ആശയങ്ങള്‍ പങ്കുവെച്ചു''മോദി എക്‌സില്‍ കുറിച്ചു. ഫലസ്തീനെ ആദ്യമായി അംഗീകരിച്ച രാജ്യങ്ങള്‍ ഒന്നാണ് ഇന്ത്യയെന്നും മോദി അനുസ്മരിച്ചു. 

ക്വാഡ് ഉച്ചകോടിയില്‍ പങ്കെടുക്കുന്നതിനാണ് മോദി യു.എസില്‍ എത്തിയത്. നേരത്തെ ആഗോള വളര്‍ച്ചക്കും വികസനത്തിനും സമാധാനത്തിനുമുള്ള ഇന്ത്യയുടെ കാഴ്ചപ്പാടുകള്‍ പ്രധാനമന്ത്രി ഉച്ചകോടിയില്‍ പങ്കുവെച്ചിരുന്നു. സംഘര്‍ഷങ്ങളും വിഭാഗീയതയും ലഘൂകരിക്കണമെന്ന സന്ദേശവും മോദി നല്‍കിയതായും വിദേശകാര്യ സെക്രട്ടറി വിക്രം മിസ്രി പ്രത്യേക വാര്‍ത്താസമ്മേളനത്തില്‍ അറിയിച്ചു.