ഇംഫാല്‍: മണിപ്പൂരില്‍ വീണ്ടും വെടിവെപ്പ്. പുലര്‍ച്ചെ മൂന്നരയോടെ ജിരിബാമിലെ പൊലിസ് ഔട്ട്‌പോസ്റ്റിനു നേരെയാണ് വെടിവെപ്പുണ്ടായത്. പ്രതിപക്ഷനേതാവ് രാഹുല്‍ ഗാന്ധി ഇന്ന് ജിരിബാം സന്ദര്‍ശിക്കാന്‍ ഇരിക്കെയാണ് സംഭവം. രൂക്ഷമായ സംഘര്‍ഷാവസ്ഥ തുടരുന്ന സാഹചര്യമാണ് കഴിഞ്ഞ ഒരുമാസമായി മേഖലയില്‍ തുടരുന്നത്.  

പ്രതിപക്ഷ നേതാവ് രാഹുല്‍ ഗാന്ധി ഇന്ന് മണിപ്പൂരിലും അസമിലുമാണ് സന്ദര്‍ശനം നടത്തുന്നുണ്ട്.  പ്രളയത്തെ തുടര്‍ന്ന് അസമിലെ ദുരിതാശ്വാസ ക്യാമ്പുകളില്‍ കഴിയുന്നവരെ സന്ദര്‍ശിക്കുന്ന രാഹുല്‍ മണിപ്പൂരിലെ വിവിധ ദുരിതാശ്വാസ ക്യാമ്പിലെത്തും. ചുരാചന്ദ്പൂര്‍ ജില്ലയിലെ ദുരിതാശ്വാസ ക്യാമ്പുകളില്‍ കഴിയുന്നവരേയും അദ്ദേഹം സന്ദര്‍ശിക്കും. 

കഴിഞ്ഞ വര്‍ഷം മെയ് മാസത്തില്‍ വംശീയ കലാപം പൊട്ടിപ്പുറപ്പെട്ടതിന് ശേഷം വടക്കു-കിഴക്കന്‍ സംസ്ഥാനത്തെ രാഹുലിന്റെ മൂന്നാമത്തെ സന്ദര്‍ശനമാണിത്. 

നേരത്തെ മണിപ്പൂരില്‍ റോക്കറ്റ് ലോഞ്ചര്‍, തോക്കുകള്‍, ഗ്രനേഡുകള്‍, ബുള്ളറ്റ് പ്രൂഫ് ജാക്കറ്റുകള്‍ തുടങ്ങി വന്‍ ആയുധ ശേഖരം പിടികൂടിയിരുന്നു.  ഇംഫാല്‍ ഈസ്റ്റില്‍ നിന്ന് കരസേനയും മണിപ്പൂര്‍ പൊലിസും സംയുക്തമായി നടത്തിയ പരിശോധനയിലാണ് ആയുധങ്ങള്‍ പിടിച്ചെടുത്തത്. കണ്ടെടുത്ത ആയുധങ്ങള്‍ കൂടുതല്‍ അന്വേഷണത്തിനായി മണിപ്പൂര്‍ പൊലിസിന് കൈമാറി.