തിരുവനന്തപുരം: സംസ്ഥാനത്ത് കൂണുകൾ പോലെ പ്ലേസ്‌കൂളും പ്രീസ്‌കൂളുകളും കുട്ടികൾക്ക് വിദ്യാഭ്യാസ പൂർവ സ്ഥാപനങ്ങൾ. എന്നാൽ ഇവയ്‌ക്കൊന്നും പ്രത്യേക നിയന്ത്രണങ്ങളോ നിബന്ധനകളോ ഇല്ല. അധ്യാപകർക്കോ ആയമാർക്കോ നിശ്ചിത യോഗ്യതകളോ മാനദണ്ഡങ്ങളോ നിഷ്‌കർഷിക്കുന്നതുമില്ല. അധ്യാപക-വിദ്യാർഥി അനുപാതമോ ആർക്കും അറിയുകയുമില്ല. നിലവിൽ ഇവയുടെ പ്രവർത്തനത്തെ കുറിച്ച് അറിയുന്നത് ഇവിടങ്ങളിൽ എന്തെങ്കിലും മനുഷ്യാവകാശ ലംഘനങ്ങളോ അപകടങ്ങളോ ഉണ്ടാകുമ്പോൾ മാത്രമാണെന്ന് ചൂണ്ടിക്കാണിക്കപ്പെടുന്നു. ഈ ഘട്ടങ്ങളിൽ ശിശുക്ഷേമ സമിതികളോ ബാലാവകാശ കമ്മിഷനോ മറ്റോ ഇടപെടുന്നതുമാത്രമാണ് കണ്ടുവരുന്നത്. ഈ സ്‌കൂളുകളെല്ലാം രജിസ്റ്റർ ചെയ്യാൻ തയ്യാറാണെങ്കിലും എവിടെ രജിസ്റ്റർ ചെയ്യണമെന്ന നിർദേശം നൽകാൻ സർക്കാരിന് കഴിയുന്നില്ലെന്നതാണ് പ്രശ്‌നം.

സംയോജന ശിശുവികസന സേവന പദ്ധതി (ഐ.സി.ഡി.എസ്)ന്റെ കീഴിലാണ് അങ്കണവാടികളെപ്പോലെ പ്ലേസ്‌കൂളുകളുമെന്നാണ് അറിയിപ്പെങ്കിലും നിയതമായ മാനദണ്ഡങ്ങൾ രൂപീകരിക്കാനാകാത്തത് ഇവയെ തോന്നിയതുപോലെ പ്രവർത്തിക്കുന്നതിന് കാരണമായിട്ടുണ്ട്.

മൂന്നു മുതൽ ആറ് വയസുവരെയുള്ള കുട്ടികളെയാണ് പ്രീസ്‌കൂളുകളിൽ ചേർക്കുന്നത്. ഇവരുടെ ബൗദ്ധിക, സ്വഭാവ സവിശേഷതകൾ കരുപ്പിടിപ്പിക്കുന്നത് ഈ സ്‌കൂളുകൾ വഴിയാണ്. കുട്ടിയുടെ ജീവിതത്തെ സ്വാധീനിക്കുന്നതാണിത്. ആദിവാസി കേന്ദ്രങ്ങളിൽ ഏഴ് കുട്ടികളുണ്ടെങ്കിൽ പിള്ളപ്പുലകൾ എന്ന പേരിൽ വിദ്യാഭ്യാസ കേന്ദ്രത്തിന് രജിസ്‌ട്രേഷൻ നൽകുന്ന രീതികളുണ്ട്.

അനൗപചാരികമായി കണക്കാക്കിയിരുന്ന ശിശുവിദ്യാഭ്യാസം ഔപചാരികമാക്കാനാണ് 2020ലെ പൊതു വിദ്യാഭ്യാസ നയത്തിൽ ലക്ഷ്യം വച്ചിരുന്നത്. ആറു വയസുവരെയുള്ള കുട്ടികളെ ശിശുവിദ്യാഭ്യാസത്തിന്റെ കീഴിൽ ഉൾപ്പെടുത്തിയിരുന്നത് മൂന്നു മുതൽ എട്ട് വയസുവരെയുള്ള കുട്ടികളെ ലക്ഷ്യമിടുന്നതാണ് പുതിയ ശിശുവിദ്യാഭ്യാസ നയത്തിൽ ലക്ഷ്യമിടുന്നത്. അടുത്തവർഷത്തോടെ എട്ട് വയസുവരെയുള്ള കുട്ടികൾക്കെല്ലാം ശാസ്ത്രീയമായ ഔപചാരിക പഠനം നൽകുന്ന ഫൗണ്ടേഷൻ കോഴ്‌സായി പ്രീസ്‌കൂളുകളെ മാറ്റാനാണ് കേന്ദ്ര നയത്തിൽ എൻ.ഇ.പി ലക്ഷ്യമാക്കുന്നതെന്നാണ് ബന്ധപ്പെട്ടവർ പറയുന്നത്. കേരളം ഇതിന്റെ ചുവടുപിടിച്ചു നീങ്ങുന്നില്ലെന്നതും ചൂണ്ടിക്കാണിക്കപ്പെടുന്നുണ്ട്.

 

Playschools operating without permits, licenses, or certifications