തിരുവനന്തപുരം: പ്രതിപക്ഷ നേതാവ് വി.ഡി സതീശന്‍ വിഴിഞ്ഞം ഉദ്ഘാടനച്ചടങ്ങില്‍ പങ്കെടുത്തേക്കില്ല. വിവാദമായപ്പോള്‍ പ്രതിപക്ഷ നേതാവിനെ ക്ഷണിച്ചുവെന്ന് വരുത്തിത്തീര്‍ക്കുകയാണ് സര്‍ക്കാര്‍ ചെയ്തതെന്ന് കോണ്‍ഗ്രസില്‍ പൊതുവികാരം ഉണ്ട്. അപമാനിക്കാനുള്ള സര്‍ക്കാരിന്റെ നീക്കത്തിന് നിന്നു കൊടുക്കേണ്ടതില്ലെന്നാണ് പാര്‍ട്ടിയുടെ വിലയിരുത്തലും. 

പാര്‍ട്ടി നേതാക്കളുമായി ചര്‍ച്ചചെയ്തതിനു ശേഷം ഇന്ന് അന്തിമതീരുമാനം എടുക്കും. വിവാദങ്ങള്‍ക്ക് പിന്നാലെയായിരുന്നു വിഴിഞ്ഞം ഉദ്ഘാടന ചടങ്ങിലേക്ക് പ്രതിപക്ഷ നേതാവ് വി.ഡി സതീശന് ക്ഷണം ലഭിച്ചത്. പ്രധാനമന്ത്രി നരേന്ദ്ര മോദി പങ്കെടുക്കുന്ന ഉദ്ഘാടന ചടങ്ങിലേക്ക് വി.ഡി സതീശനെ ക്ഷണിക്കാത്തതില്‍ വലിയ വിമര്‍ശനമാണ് കോണ്‍ഗ്രസ് ഉയര്‍ത്തിയത്. സര്‍ക്കാരിന്റെ വാര്‍ഷികം പ്രതിപക്ഷം ബഹിഷ്‌കരിക്കുന്നതിനാലാണ് വിളിക്കാത്തതെന്നായിരുന്നു സംസ്ഥാന സര്‍ക്കാരിന്റെ വാദം.

 വിഴിഞ്ഞം ട്രയല്‍ റണ്ണിന് പ്രതിപക്ഷ നേതാവിനെ ക്ഷണിക്കാതിരുന്നപ്പോള്‍ അന്ന് സര്‍ക്കാര്‍ ന്യായീകരിച്ചത് വലിയ ആഘോഷം വരുകയല്ലേ എന്നായിരുന്നു. വിഴിഞ്ഞം ഉദ്ഘാടനം സര്‍ക്കാരിന്റെ വാര്‍ഷിക പരിപാടിയാണോ എന്നായിരുന്നു കോണ്‍ഗ്രസിന്റെ ചോദ്യം. മുഖ്യമന്ത്രിയുടെ കുടുംബത്തിന്റെ വിഴിഞ്ഞം സന്ദര്‍ശനവും പ്രതിപക്ഷം ആയുധമാക്കി. വിഴിഞ്ഞം തുറമുഖത്തിന് കാരണക്കാരന്‍ ഉമ്മന്‍ ചാണ്ടിയാണെന്നതും സര്‍ക്കാരിനെ യുഡിഎഫ് ഓര്‍മിപ്പിച്ചു. പിന്നാലെയാണ് തുറമുഖ മന്ത്രിയുടെ കത്ത് പ്രതിപക്ഷ നേതാവിന്റെ ഔദ്യോഗിക വസതിയില്‍ എത്തിയത്.