തിരുവനന്തപുരം: ഗതാഗത മന്ത്രി കെ.ബി. ഗണേഷ് കുമാറിനെതിരെ രൂക്ഷ വിമർശനവുമായി മുൻ ഗതാഗത മന്ത്രിയും എം.എൽ.എയുമായ ആന്റണി രാജു. കെ.എസ്.ആർ.ടി.സിയിൽ ഒന്നാം തീയതി ശമ്പളം നൽകാൻ സർക്കാർ വായ്പയെടുക്കുന്നത് കോർപ്പറേഷന്റെ കടബാധ്യത വർധിപ്പിക്കുമെന്ന് ആന്റണി രാജു ആരോപിച്ചു. താൻ മന്ത്രിയായിരുന്ന കാലത്ത് കടബാധ്യത കൂട്ടാൻ തയാറായിരുന്നില്ലെന്നും, കടക്കെണിയിൽ അകപ്പെട്ട കെ.എസ്.ആർ.ടി.സിക്ക് ഇത് അമിത ഭാരമാകുമെന്ന് തനിക്ക് അറിയാമായിരുന്നുവെന്നും അദ്ദേഹം പറഞ്ഞു.

നേരത്തെ 50 കോടി രൂപയായിരുന്ന ഓവർ ഡ്രാഫ്റ്റ് ഇപ്പോൾ 100 കോടി രൂപയായി ഉയർന്നതായും ഇത് കൂടുതൽ പലിശയിലേക്കും നഷ്ടം വർധിക്കാനും കാരണമാകുമെന്നും ആന്റണി രാജു ചൂണ്ടിക്കാട്ടി. "ഇത് താൽക്കാലിക മുട്ടുശാന്തി മാത്രമാണ്," അദ്ദേഹം വിമർശിച്ചു.

നിലവിൽ കെ.എസ്.ആർ.ടി.സിക്ക് വരുമാനം നേടിക്കൊണ്ടുവരുന്ന പദ്ധതികൾ തന്റെ ഭരണകാലത്ത് ആരംഭിച്ചവയാണെന്നും ഇപ്പോൾ പുതിയ പദ്ധതികളൊന്നും കാണാനില്ലെന്നും ആന്റണി രാജു ആരോപിച്ചു.