ന്യൂഡൽഹി: പഹൽഗാം ഭീകരാക്രമണത്തിന്റെ പശ്ചാത്തലത്തിൽ ഇന്ത്യ-പാക് സംഘർഷം രൂക്ഷമായിരിക്കെ, ഇന്ത്യൻ സൈന്യത്തിന്റെ വെബ്‌സൈറ്റുകൾ ഹാക്ക് ചെയ്യാൻ പാകിസ്താൻ ഹാക്കർമാർ നടത്തിയ ശ്രമം ഇന്ത്യൻ സേന പരാജയപ്പെടുത്തി. 'ഐഒകെ ഹാക്കർ' എന്ന പാകിസ്താൻ ഗ്രൂപ്പാണ് സൈബർ ആക്രമണത്തിന് പിന്നിൽ. ശ്രീനഗർ ആർമി പബ്ലിക് സ്‌കൂൾ, ആർമി വെൽഫെയർ ഹൗസിംഗ് ഓർഗനൈസേഷൻ (എഡബ്ല്യുഎച്ച്ഒ) ഡാറ്റാബേസ്, ഇന്ത്യൻ വ്യോമസേനയുടെ പ്ലേസ്മെന്റ് പോർട്ടൽ എന്നിവ ലക്ഷ്യമിട്ട് നാല് തവണ ഹാക്കിങ് ശ്രമം നടന്നതായി ഇന്റലിജൻസ് റിപ്പോർട്ട്.

രാജസ്ഥാൻ വിദ്യാഭ്യാസ വകുപ്പിന്റെ വെബ്‌സൈറ്റും പാക് ഹാക്കർമാർ നേരത്തെ ഹാക്ക് ചെയ്തിരുന്നു. പഹൽഗാം സംഭവം ഭീകരാക്രമണമല്ലെന്നും, ഇന്ത്യൻ സർക്കാർ ജനങ്ങളെ ഭിന്നിപ്പിക്കാനും യുദ്ധം പ്രകോപിപ്പിക്കാനും നടത്തിയ ഗൂഢാലോചനയാണെന്നും ആരോപിച്ച് ഹാക്കർമാർ പോസ്റ്റർ അപ്‌ലോഡ് ചെയ്തു. "നിങ്ങളാണ് യുദ്ധം തുടങ്ങിയത്. ഇനി വെടിയുണ്ടകൾ കൊണ്ടല്ല, ഡിജിറ്റൽ യുദ്ധമായിരിക്കും. മുന്നറിയിപ്പോ ദയയോ പ്രതീക്ഷിക്കേണ്ട. നിങ്ങളുടെ ഇന്റലിജൻസ് ഏജൻസികൾ വ്യാജവും സുരക്ഷാ സംവിധാനങ്ങൾ മിഥ്യയുമാണ്. ഞങ്ങൾ തുടങ്ങിക്കഴിഞ്ഞു," എന്നായിരുന്നു പോസ്റ്ററിലെ സന്ദേശം.

ഹാക്കിങ് ശ്രമം കണ്ടെത്തിയ ഉടൻ രാജസ്ഥാനിലെ ഐടി വിഭാഗം വെബ്‌സൈറ്റ് വീണ്ടെടുക്കാനുള്ള നടപടികൾ തുടങ്ങി. തന്ത്രപ്രധാന ഡാറ്റകൾ നഷ്ടപ്പെട്ടിട്ടില്ലെന്ന് വിദ്യാഭ്യാസ മന്ത്രി അറിയിച്ചു. തിങ്കളാഴ്ച തദ്ദേശ വകുപ്പിന്റെയും ജയ്പൂർ വികസന അതോറിറ്റിയുടെയും വെബ്‌സൈറ്റുകൾ ഹാക്ക് ചെയ്യപ്പെട്ടിരുന്നെങ്കിലും അവ പുനഃസ്ഥാപിച്ചു.

തുടർ ആക്രമണ സാധ്യത കണക്കിലെടുത്ത് സൈന്യം സൈബർ സുരക്ഷ ശക്തമാക്കി. കേന്ദ്ര ആഭ്യന്തര മന്ത്രാലയം ഉന്നതതല യോഗം ചേർന്നു. ആഭ്യന്തര സെക്രട്ടറി, ബിഎസ്എഫ് ഡയറക്ടർ ജനറൽ, അസം റൈഫിൾസ് മേധാവി, എൻഎസ്ജി മേധാവി തുടങ്ങിയവർ യോഗത്തിൽ പങ്കെടുത്തു.