പത്തനംതിട്ട: പൊതു വിദ്യാലയങ്ങളിൽ ഡിവിഷൻ ഫാൾ ഒഴിവാക്കാനും തസ്തികകൾ നിലനിർത്താനും ആകർഷകമായ വാഗ്ദാനങ്ങളുമായി കുട്ടികളെ പിടിക്കാൻ അധ്യാപകർ വീടുകളിലേക്ക്. കുട്ടികളുടെ  എണ്ണം കൂടുന്നതനുസരിച്ച് ഡിവിഷനുകൾ കൂടുകയും  കുറയുന്ന മുറയ്ക്ക് തസ്തിക നഷ്ടമാകുകയും ചെയ്യും. നിലനിൽപ്പ് മുന്നിൽക്കണ്ടാണ് കുട്ടികളെ ചാക്കിലിടാനുള്ള കഠിനശ്രമങ്ങൾ നടത്തുന്നത്.

ഓഫറുകൾ നിരത്തിയാണ് ആകർഷിക്കുന്നത്. തെക്കൻ ജില്ലകളിലെ സ്കൂളുകളാണ്  കടുത്ത  മത്സരം നടത്തുന്നത്. കുട്ടികളുടെ എണ്ണം  കൂടി വരുമ്പോൾ അധ്യപകരുടെ എണ്ണവും കൂടുന്നതുവഴി മാനേജ്മെൻ്റിന് സാമ്പത്തിക ലാഭം ഉറപ്പിക്കാം. സർക്കാർ സ്കൂളുകളും കുട്ടികളെ ഒപ്പിക്കലിൽ പിന്നോട്ടില്ല.  കുട്ടികൾ കുറഞ്ഞാൽ മറ്റ് ജില്ലകളിലേക്ക് സ്ഥലംമാറ്റം വാങ്ങി പോകേണ്ടി വരുന്നത് ഒഴിവാക്കാനാണ് പ്രധാനമായും അധ്യാപകരും പെടാപാടുപെടുന്നത്. എൽ.പി സ്കൂളുകളിൽ നഴ്സറി ആരംഭിച്ച് ഒന്നാം ക്ലാസിലേക്ക് കുട്ടികളെ എത്തിക്കുകയെന്ന തന്ത്രം പല സ്കൂളുകളും പരീക്ഷിക്കുന്നുണ്ട്.

ഇംഗ്ലിഷ് മീഡിയം സ്കൂളുകൾ കൂടുമ്പോൾ പൊതുവിദ്യാലയങ്ങളിൽ കുട്ടികൾ  കുറഞ്ഞുവരുന്നതിന് തടയിടാൻ പല തന്ത്രങ്ങളാണ് പരീക്ഷിക്കുന്നത്. പ്രധാനമായും 1, 5, 8 ക്ലാസുകളിലേക്കാണ് കുട്ടികളെ ചേർക്കണമെന്ന ആവശ്യവുമായി അധ്യാപകരെത്തുന്നത്.
ഭവന സന്ദർശനം, സോഷ്യൽ മീഡിയ പരസ്യങ്ങൾ, സ്കൂൾ ബസ് പരസ്യങ്ങൾ, യൂനിഫോം, ബാഗ്, ബുക്ക് എന്നിവയും  ചിലർ പണവും വാഗ്ദാനം ചെയ്യുന്നു.

ചില സ്കൂളുകൾ സൈക്കിളും നൽകുന്നുണ്ട്. ജൂണിലെ ആറാം പ്രവൃത്തി ദിവസം തലയെണ്ണി, വിദ്യാർഥികൾ കുറവുള്ള സ്കൂളുകളിൽ തസ്തികകൾ വെട്ടിച്ചുരുക്കാറുണ്ട്. വിദ്യാർഥികൾ കൂടുതലുള്ള വിദ്യാലയങ്ങളിൽ പുതിയ തസ്തികകൾ സൃഷ്ടിക്കാറുമുണ്ട്.

Division fall should be avoided and posts should be maintained; Teachers go to homes with promises to catch children