തിരുവനന്തപുരം: സംസ്ഥാനത്തെ ചുട്ടുപൊള്ളിച്ച് അന്തരീക്ഷ താപനില ഉയരുന്നതിനൊപ്പം സൂര്യരശ്മിയിൽ നിന്നുള്ള അൾട്രാവയലറ്റ് വികിരണത്തിൻ്റെ തോതും വർധിച്ചിട്ടുണ്ട്. ഇന്നലെ കൊല്ലം, ഇടുക്കി ജില്ലകളിൽ യു.വി ഇൻഡക്‌സ് നിരക്ക് എട്ടിനു മുകളിൽ രേഖപ്പെടുത്തി. പത്തനംതിട്ടയിൽ ഏഴും ആലപ്പുഴ, കോട്ടയം, മലപ്പുറം, പാലക്കാട് ജില്ലകളിൽ ആറുമാണ് രേഖപ്പെടുത്തിയത്.

യു.വി ഇൻഡക്‌സ് ആറ് മുതൽ ഏഴുവരെയാണെങ്കിൽ മഞ്ഞ മുന്നറിയിപ്പ് നൽകും. എട്ട് മുതൽ 10 വരെയാണെങ്കിൽ ജാഗ്രത പുലർത്തേണ്ട ഓറഞ്ച് മുന്നറിയിപ്പാണ് നൽകുന്നത്. ഇൻഡക്‌സ് 11 ന് മുകളിൽ ആണെങ്കിൽ ഗുരുതര സാഹചര്യമാണ്. ഇൗ ഘട്ടത്തിൽ ചുവപ്പു മുന്നറിയിപ്പ് നൽകും. അൾട്രാവയലറ്റ് വികിരണത്തിൻ്റെ തോത് ഉയരുന്നത് സൂര്യാഘാതത്തിനും നേത്രരോഗങ്ങൾക്കും ചർമരോഗങ്ങൾക്കും കാരണമാകും. ശരീരം മുഴുവൻ മറയ്ക്കുന്ന പരുത്തി വസ്ത്രങ്ങൾ, തൊപ്പി, കുട, സൺഗ്ളാസ് എന്നിവ ഉപയോഗിക്കുന്നത് യു.വി വികിരണത്തെ തടയാൻ സഹായിക്കും.            

ഓട്ടോമാറ്റിക് വെതർ സ്റ്റേഷനുകളിൽ നിന്നുള്ള കണക്കുകൾ അനുസരിച്ച് ഇന്നലെ ഉച്ചയ്ക്ക് പാലക്കാട് കാഞ്ഞിരപ്പുഴയിൽ 47 ഡിഗ്രി താപനില രേഖപ്പെടുത്തി. എറണാകുളം കളമശ്ശേരിയിൽ 45 ഡിഗ്രിയും പാലക്കാട് മലമ്പുഴ ഡാമിൽ 40.6 ഡിഗ്രിയും തൃശൂർ വെള്ളാനിക്കരയിൽ 40.9 ഡിഗ്രിയും രേഖപ്പെടുത്തി. പാലക്കാട്, തൃശൂർ, കൊല്ലം,പത്തനംതിട്ട, കോട്ടയം, എറണാകുളം, മലപ്പുറം, കോഴിക്കോട്, കണ്ണൂർ, കാസർകോട് ജില്ലകളിൽ ഉയർന്ന താപനില സാധാരണയേക്കാൾ മൂന്ന് ഡിഗ്രി വരെ ഉയരുമെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകിയിട്ടുണ്ട്. ഈ ജില്ലകളിൽ യെല്ലോ അലർട്ടും നൽകിയിട്ടുണ്ട്.