കുവൈത്ത്: ജീവപര്യന്തം തടവ് പരമാവധി 20 വര്‍ഷമായി കുറച്ച് കുവൈത്ത്. അമീര്‍ ഷെയ്ഖ് മിഷാല്‍ അല്‍ അഹമ്മദ് അല്‍ ജാബര്‍ അല്‍ സബയുടെ നിര്‍ദ്ദേശങ്ങള്‍ പാലിച്ച് ആക്ടിംഗ് പ്രധാനമന്ത്രിയും ആഭ്യന്തര മന്ത്രിയുമായ ഷെയ്ഖ് ഫഹദ് യൂസഫ് സൗദ് അല്‍ സബ പുറപ്പെടുവിച്ച തീരുമാനത്തിലൂടെയാണ് പുതിയ പ്രഖ്യാപനം വന്നത്. 

കുവൈത്തിലെ ശിക്ഷാ സമ്പ്രദായത്തിലെ പ്രധാനപ്പെട്ട മാറ്റമായാണ് പലരും ഈ നീക്കത്തെ നോക്കിക്കാണുന്നത്. നീതിയും പുനരധിവാസവും സന്തുലിതമാക്കുക എന്നതാണ് അധികാരികളുടെ ലക്ഷ്യമെന്ന് അധികൃതര്‍ പറഞ്ഞു. 

ജീവപര്യന്തം തടവ് അനുഭവിക്കുന്ന തടവുകാരുടെ കേസുകള്‍ 20 വര്‍ഷം തികയുന്നതിന് മൂന്ന് മാസം മുമ്പ് അവലോകനം ചെയ്യുന്നതിനായി ഒരു പ്രത്യേക സമിതി രൂപീകരിക്കാനും ഷെയ്ഖ് ഫഹദ് അല്‍ സബ ഉത്തരവിട്ടിട്ടുണ്ട്. യോഗ്യരായ തടവുകാരുടെ കാര്യത്തില്‍ മാറ്റം ഉറപ്പാക്കാനും അദ്ദേഹം ഉത്തരവിട്ടു.

ശിക്ഷാ കാലയളവിനിടെ മനം മാറ്റം ഉണ്ടായ തടവുകാരുടെ പേരുകള്‍ പട്ടികപ്പെടുത്തുന്നതു വേഗത്തിലാക്കാന്‍ കറക്ഷണല്‍ സ്ഥാപനങ്ങള്‍ക്കും ശിക്ഷാ നിര്‍വ്വഹണ അധികാരികള്‍ക്കും നിര്‍ദ്ദേശം നല്‍കിയിട്ടുണ്ട്. കുവൈത്തിന്റെ നീതിന്യായ വ്യവസ്ഥയെ നവീകരിക്കുന്നതിനും ജയിലുകള്‍ക്കുള്ളിലെ പുനരധിവാസ പരിപാടികള്‍ മെച്ചപ്പെടുത്തുന്നതിനുമുള്ള ശ്രമങ്ങളുമായി ഈ തീരുമാനം യോജിക്കുന്നുവെന്ന് മന്ത്രി പറഞ്ഞു.

'ശിക്ഷാ നയങ്ങള്‍ നീതിക്കും പരിഷ്‌കരണത്തിനും സംഭാവന നല്‍കുന്നുണ്ടെന്ന് ഉറപ്പാക്കാന്‍ ആഭ്യന്തര മന്ത്രാലയം പ്രതിജ്ഞാബദ്ധമാണ്'  അല്‍ സബ സെന്‍ട്രല്‍ ജയില്‍ സന്ദര്‍ശനത്തിനിടെ തടവുകാരുമായും അവരുടെ കുടുംബങ്ങളുമായും കൂടിക്കാഴ്ച നടത്തുന്നതിനിടെ ഷെയ്ഖ് ഫഹദ് പറഞ്ഞു.

Kuwait reduces life imprisonment to maximum of 20 years and  committee formed to examine cases of life prisoners