എടത്വ (ആലപ്പുഴ): പഞ്ചായത്തുകളിൽ കെ-സ്മാർട്ട് സോഫ്റ്റ്‍വെയർ പരിഷ്‌കരണം അടുത്ത മാസം മുതൽ നടപ്പിലാക്കാൻ നിർദേശിച്ചതോടെ പഞ്ചായത്തുകൾ ആശങ്കയിൽ. ഉപയോഗിച്ചുവരുന്ന ഐ.എൽ.ജി.എം.എസ് സോഫ്റ്റ്‍വയർ കുറ്റമറ്റ രീതിയിൽ കൈകാര്യം ചെയ്തുവരുമ്പോഴാണ് കെ-സ്മാർട്ട് സോഫ്റ്റ്‍വയർ പരിഷ്‌കരണം നടപ്പാക്കുന്നത്. ആദ്യഘട്ടം കെ-സ്മാർട്ട് സോഫ്റ്റ്‍വയർ കോർപ്പറേഷനിലും മുനിസിപ്പാലിറ്റിയിലും നടപ്പാക്കിയെങ്കിലും സോഫ്റ്റ്‍വയറിന്റെ ന്യൂനതകൾ പരിഹരിച്ച് പൂർണമായി വിജയകരമാക്കാൻ ഇതുവരെ സാധിച്ചിട്ടില്ല.

ഈ സാഹചര്യത്തിലാണ് പഞ്ചായത്തുകളിൽ വിജയകരമായി ഉപയോഗിച്ചുവന്നിരുന്ന ഐ.എൽ.ജി.എം.എസ് സോഫ്റ്റ്‍വയർ മാറ്റി കെ-സ്മാർട്ട് സോഫ്റ്റ്‍വയറിലേക്ക് പഞ്ചായത്തുകളെ മാറ്റാനുള്ള നിർദേശം. സോഫ്റ്റ്‍വയർ പരിഷ്‌കരണത്തിന്റെ മുന്നോടിയായി സാമ്പത്തിക വർഷത്തിന്റെ അവസാനമായ മാർച്ചിൽ ധൃതിപിടിച്ച് ഉദ്യോഗസ്ഥർക്കുള്ള പരിശീലനം നടത്തിവരുകയാണ്. ഇതുകാരണം സാമ്പത്തിക വർഷം അവസാനിക്കുവാനുള്ള സമയത്ത് ജീവനക്കാരുടെ കുറവ് പഞ്ചായത്തുകളുടെ പ്രവർത്തനത്തെ താളംതെറ്റിക്കുന്നു.

ജീവനക്കാർക്കൊപ്പം വ്യാപാരികളും ആശങ്കയിലാണ്. നിലവിലുള്ള ലൈസൻസ് പുതുക്കി നൽകാനായി പഞ്ചായത്തിനെ സമീപിക്കുമ്പോൾ പുതിയ സോഫ്റ്റ്‍വയർ വരുന്നതിനാൽ അപേക്ഷകൾ സ്വീകരിക്കാൻ സാധിക്കുകയില്ലെന്നാണ് ഉദ്യോഗസ്ഥർ നൽകുന്ന സൂചന. ലൈസൻസ് പുതുക്കൽ മാത്രമല്ല, സാമ്പത്തിക വർഷാവസാനം ചെയ്തുതീർക്കേണ്ട നിരവധി പദ്ധതികളാണ് തകിടംമറിയുന്നത്. തൊഴിലുറപ്പ് തൊഴിൽ മുതൽ ഗ്രാമീണ വികസന പ്രവർത്തനങ്ങൾ വരെയുള്ള പദ്ധതികളുടെ ടെൻഡർ നടപടി ബാക്കിയുണ്ട്. സാമ്പത്തിക വർഷം തീരുന്നതിന് മുമ്പ് പദ്ധതി നിർവഹണം പൂർത്തിയായില്ലെങ്കിൽ 2025- 26 സാമ്പത്തിക വർഷത്തിലെ വികസന പ്രവർത്തനങ്ങൾ പലതും താളംതെറ്റും.