കോഴിക്കോട്: കോഴിക്കോട് ഓമശ്ശേരി പുത്തൂരിൽ വിദ്യാർത്ഥികളുമായി പോവുകയായിരുന്ന സ്കൂൾ വാൻ മറിഞ്ഞ് അപകടമുണ്ടായി. ഓമശ്ശേരി മാനിപുരം എയുപി സ്കൂളിന്റെ വാനാണ് അപകടത്തിൽപ്പെട്ടത്. ഇന്ന് വൈകീട്ട് 4.30ഓടെ ഉണ്ടായ അപകടത്തിൽ, വാനിൽ പത്ത് വിദ്യാർത്ഥികൾ ഉണ്ടായിരുന്നുവെന്ന് വിവരം ലഭിച്ചു. നിസ്സാര പരിക്കേറ്റ ഇവരെ നാട്ടുകാർ ഉടൻ സമീപത്തുള്ള സ്വകാര്യ ആശുപത്രിയിൽ പ്രവേശിപ്പിച്ചു.

ഡ്രൈവറായ മുഹമ്മദ് ബഷീറിന് കൈയിൽ പരിക്ക് പറ്റിയിട്ടുണ്ട്. മൂന്ന് വിദ്യാർത്ഥികളും ഡ്രൈവറും ഒഴികെയുള്ളവർക്കു പ്രാഥമിക ചികിത്സ നൽകുകയും വീട്ടിലേക്ക് മടങ്ങുകയും ചെയ്തു. ശേഷിച്ച വിദ്യാർത്ഥികളെ സ്‌കാനിംഗിനായി ആശുപത്രിയിലേക്ക് റഫർ ചെയ്യുകയായിരുന്നു. വാനിന്റെ ആക്‌സിൽ ഒടിഞ്ഞതിനാലാണ് അപകടം സംഭവിച്ചതെന്ന് ഡ്രൈവർ പറഞ്ഞു.