ഇന്ത്യ-ഇംഗ്ലണ്ട് പരമ്പര ആരംഭിക്കാൻ ഇനി ദിവസങ്ങൾ മാത്രമേ ബാക്കിയുള്ളൂ. ഇന്ത്യയിൽ നടക്കുന്ന പരമ്പരയിൽ അഞ്ചു ട്വന്റി ട്വന്റിയും മൂന്ന് ഏകദിനവും ആണ് ഇംഗ്ലണ്ട് കളിക്കുക. ജനുവരി 22 മുതൽ ഫെബ്രുവരി രണ്ട് വരെയാണ് ട്വന്റി ട്വന്റി പരമ്പര നടക്കുക. ഇതിനു ശേഷം ഫെബ്രുവരി ആറ് മുതൽ 12 വരെ ഏകദിന മത്സരങ്ങളും നടക്കും.

ഈ ട്വന്റി ട്വന്റി പരമ്പരയിൽ ഇംഗ്ലണ്ട് ക്യാപ്റ്റൻ ജോസ് ബട്ലറെ കാത്തിരിക്കുന്നത് ഒരു തകർപ്പൻ റെക്കോർഡാണ്. പരമ്പരയിൽ ഇന്ത്യക്കെതിരെ 151 റൺസ് കൂടി നേടിയാൽ ഇന്ത്യ-ഇംഗ്ലണ്ട് ട്വന്റി ത്വൻറ് പരമ്പരയിൽ ഏറ്റവും കൂടുതൽ റൺസ് നേടുന്ന താരമായി മാറാൻ ബട്ലറിനു സാധിക്കും. നിലവിൽ ഈ നേട്ടത്തിൽ ഒന്നാം സ്ഥാനത്തുള്ളത് വിരാട് കോഹ്‌ലിയാണ്. ഇംഗ്ലണ്ടിനെതിരെ  21 മത്സരങ്ങളിൽ നിന്ന് 648 റൺസാണ് വിരാട് നേടിയിട്ടുള്ളത്. 498 റൺസുമായി ബട്ലർ ആണ് ഈ നേട്ടത്തിൽ രണ്ടാം സ്ഥാനത്തുള്ളത്. 

467 റൺസുമായി രോഹിത് ശർമയാണ് മൂന്നാം സ്ഥാനത്തുള്ളത്. 2024ലെ ട്വന്റി ട്വന്റി ലോകകപ്പ് വിജയത്തിന് ശേഷം രോഹിത്തും വിരാടും ട്വന്റി ട്വന്റിയിൽ നിന്നും വിരമിച്ചിരുന്നു. അതുകൊണ്ട് തന്നെ മറ്റൊരു താരവും ഈ പരമ്പരയിൽ ബട്ലറിനു മുമ്പിൽ വെല്ലുവിളി ഉയർത്താൻ ഇല്ലാത്തതിനാൽ ഇന്ത്യക്കെതിരെ മികച്ച പ്രകടനം നടത്തിയാൽ വിരാടിനെ മറികടന്നുകൊണ്ട് ഒന്നാം സ്ഥാനം സ്വന്തമാക്കാൻ ബട്ലറിനു സാധിക്കും. 

ഇന്ത്യക്കെതിരെ 356 റൺസ് നേടിയ ജേസൺ റോയ് ആണ് ഈ പട്ടികയിൽ നാലാം സ്ഥാനത്തുള്ളത്. 347 റൺസ് നേടിയ ഇയോൻ മോർഗൻ അഞ്ചാം സ്ഥാനത്തുമാണ് ഉള്ളത്.