ഭോപ്പാല്‍: മധ്യപ്രദേശില്‍ ജയ് ശ്രീ റാം വിളികളുമായെത്തിയ സംഘ്പരിവാര്‍ പ്രവര്‍ത്തകര്‍ ജൈനക്ഷേത്രത്തിന് നേരെ ആക്രമണം നടത്തി. സാഗര്‍ ജില്ലയിലെ ബഡാ ബസാര്‍ പ്രദേശത്തെ ജാഡിയയിലുള്ള ജൈന ക്ഷേത്രമാണ് ആക്രമിക്കപ്പെട്ടത്. സംഭവത്തെത്തുടര്‍ന്ന് പ്രദേശത്ത് സംഘര്‍ഷാവസ്ഥ നിലനില്‍ക്കുകയാണ്. ജാഡിയ വിഭാഗത്തില്‍പ്പെട്ട മൂന്ന് പേര്‍ക്ക് പരുക്കേറ്റു. രണ്ടുദിവസമായി പ്രദേശത്ത് ബന്ദിന് സമാനമായ അവസ്ഥയായിരുന്നു. കടകള്‍ അടഞ്ഞുകിടന്നു. പ്രദേശം മുഴുവന്‍ അടച്ചിടുകയും നിരോധനാജ്ഞ പ്രഖ്യാപിക്കുകയും ചെയ്തു. എന്നാല്‍ ജൈന യുവാക്കള്‍ ഹിന്ദുക്ഷേത്രം ആക്രമിച്ചതിന് പകരമായാണ് ജനക്ഷേത്രത്തിന് നേര്‍ക്കുണ്ടായ ആക്രമണമെന്നാണ് ഹിന്ദുത്വവാദികള്‍ പറയുന്നത്.

ശനിയാഴ്ചയാണ് സംഭവങ്ങള്‍ക്ക് തുടക്കം. ഹിന്ദുത്വവാദികളായ ആള്‍ക്കൂട്ടം വടികളും ഇരുമ്പുഡണ്ഡുകളുമായാണ് ആക്രമണം നടത്തിയത്. ഇത് ചെറുക്കാന്‍ ജൈനയുവാക്കളും എത്തിയതോടെ പൊലിസ് ഇരുവിഭാഗത്തെയും ലാത്തിച്ചാര്‍ജ്ജ് നടത്തിയ പിന്തിരിപ്പിക്കുകയായിരുന്നു. മുതിര്‍ന്ന പൊലിസും അഡ്മിനിസ്‌ട്രേഷന്‍ ഉദ്യോഗസ്ഥരും രാത്രി വൈകിയും പ്രദേശത്ത് പട്രോളിംഗ് നടത്തി സ്ഥിതിഗതികള്‍ നിയന്ത്രിക്കാനും സമാധാനം നിലനിര്‍ത്താനും ശ്രമിച്ചതായി അധികൃതര്‍ അറിയിച്ചു. സംഭവത്തിലെ മുഖ്യപ്രതി മോനു ജെയിന്‍ ഞായറാഴ്ച രാത്രി വൈകി അറസ്റ്റിലായി. പ്രദേശം സ്ഥിതിചെയ്യുന്ന കോട്‌വാലി പൊലിസ് സ്‌റ്റേഷന്‍ ഇന്‍ചാര്‍ജ് നവീന്‍ ജെയിന്‍ അക്രമികള്‍ക്കെതിരേ നടപടിയെടുത്തില്ലെന്നും പക്ഷപാതപരമായി പെരുമാറിയെന്നും ആരോപണമുയര്‍ന്നതോടെ അദ്ദേഹത്തെ മാറ്റി. 

ആക്രമണത്തിന്റെയും വിഡിയോ ദൃശ്യങ്ങലും പുറത്തുവന്നിട്ടുണ്ട്. ജയ് ശ്രീറാം വിളികളുമായി പാഞ്ഞടുക്കുന്നതും തകര്‍ക്കുന്നതുമാണ് ദൃശ്യങ്ങളിലുള്ളത്. മുസ്ലിം ക്രിസ്ത്യന്‍ ന്യൂനപക്ഷങ്ങളുടെ സ്ഥാപനങ്ങള്‍ക്ക് ശേഷം ഹിന്ദുത്വവാദികള്‍ ഇപ്പോള്‍ ജൈനരെയും ലക്ഷ്യംവയ്ക്കുകയാണെന്ന് വിഡിയോ പങ്കുവച്ച് പലരും അഭിപ്രായപ്പെട്ടു.

Story highlights: Tension erupted in Madhya Pradesh’s Sagar District on Sunday, after Hindutva activists broke into a Jain temple and vandalized it.