മസ്കത്ത്: ശൈത്യകാല അവധിക്ക് ശേഷം ഒമാനിലെ ഇന്ത്യൻ സ്‌കൂളുകൾ തുറക്കുകയാണ്. അവധിയാഘോഷത്തിനായി നാട്ടിലേക്ക് തിരിച്ച പ്രവാസികൾ മടങ്ങിയെത്തിക്കൊണ്ടിരിക്കുന്നു. ഇതിനകം തന്നെ പല കുടംബങ്ങളും തിരിച്ചെത്തിയിട്ടുണ്ട്. മുൻ കാലങ്ങളെ അപേക്ഷിച്ച് മടക്ക യാത്രയിലും കുറഞ്ഞ നിരക്കിൽ വിമാന ടിക്കറ്റ് ലഭിക്കുന്നുവെന്നത് പ്രവാസികൾക്ക് ഏറെ ആശ്വാസം പകരുന്ന കാര്യമാണ്.

അതേസമയം, മുൻവർഷങ്ങളെ അപേക്ഷിച്ച് ഇക്കുറി നാട്ടിലേക്ക് പറന്ന പ്രവാസി കുടുംബങ്ങളുടെ എണ്ണം കുറവായിരുന്നു. പല രക്ഷിതാക്കൾക്കും അവധി ലഭിക്കാത്തതും അവധിയുടെ ആദ്യ ദിനങ്ങളിലുള്ള ഉയർന്ന യാത്രാ ചെലവുമാണ് നാട്ടിലെത്തുന്നതിൽ നിന്ന് പ്രവാസികളെ പിന്തിരിപ്പിച്ചത്.

അതേസമയം വിദ്യാലയങ്ങളിൽ അവധി കഴിഞ്ഞ് തുറക്കുന്നതിനുള്ള എല്ലാ തയ്യാറെടുപ്പുകളും പൂർത്തിയായിട്ടുണ്ട്. വിദ്യാർഥികളെ വരവേൽക്കുന്നതിനുള്ള നടപടികൾ തകൃതിയായി നടക്കുന്നു. മാത്രമല്ല ഇടവേളക്ക് ശേഷം സ്‌കുളിലേക്ക് മടങ്ങുന്ന വിദ്യാർഥികളും ഏറെ ആവേശത്തിലാണ്. അടുത്ത മാർച്ച് വരെ വിദ്യാർഥികൾക്ക് വിശ്രമമില്ലാത്ത പഠനമായിരിക്കും. സ്കൂ‌ൾ വാർഷികം, കായിക മേള, ആർട്‌സ് ഡേ ഇതെല്ലാം തന്നെ അവധിക്ക് മുൻപ് പൂർത്തിയാക്കിയിരുന്നു.

Indian schools in Oman have resumed classes after the winter break, marking the end of the holiday season for students.