ചെന്നൈ: അണ്ണാ സര്‍വകലാശാല കാമ്പസില്‍ പെണ്‍കുട്ടിയെ ബലാത്സംഗം ചെയ്ത് സംഭവത്തില്‍ സ്വന്തം ശരീരത്തില്‍ ചാട്ടവാര്‍ കൊണ്ടടിച്ച് പ്രതിഷേധിച്ച് തമിഴ്നാട് ബി.ജെ.പി അധ്യക്ഷന്‍ കെ. അണ്ണാമലൈ. ഡി.എം.കെ സര്‍ക്കാര്‍ അധികാരത്തില്‍ നിനന് താഴെ ഇറങ്ങുന്നതുവരെ ചെരിപ്പ് ഉപയോഗിക്കില്ലെന്ന് പ്രതിജ്ഞയെടുത്ത അണ്ണാമലൈ ഇന്ന് രാവിലെ വീട്ടുമുറ്റത്ത് ശരീരത്തില്‍ സ്വയം ചാട്ടവാറുകൊണ്ട് അടിക്കുകയായിരുന്നു. 48 ദിവസത്തെ വ്രതമെടുക്കുകയാണെന്നും അദ്ദേഹം പ്രഖ്യാപിച്ചു. 

പച്ച നിറത്തിലുള്ള മുണ്ടുടുത്ത് സ്വന്തം വീടിന് മുന്നിലായിരുന്നു അണ്ണാമലൈയുടെ പ്രതിഷേധം. ആറ് തവണ സ്വയം ചാട്ടവാറടിച്ചു. ഏഴാമതായി അടിക്കാനൊരുങ്ങവെ ചുറ്റും കൂടി നിന്ന പ്രവര്‍ത്തകരിലൊരാള്‍ അണ്ണാമലൈയെ തടഞ്ഞുനിര്‍ത്തി കെട്ടിപ്പിടിക്കുന്നത് വീഡിയോയില്‍ കാണാം. 

'തമിഴ് സംസ്‌കാരം മനസ്സിലാക്കുന്ന ആര്‍ക്കും ഇത് മനസ്സിലാകും. സ്വയം ചാട്ടവാറടി... സ്വയം ശിക്ഷിക്കുക... ഇത് ഈ സംസ്‌കാരത്തിന്റെ ഭാഗമാണ്,'- അണ്ണാമലൈ മാധ്യമപ്രവര്‍ത്തകരോട് പറഞ്ഞു. 

ഡിസംബര്‍ 23ന് രാത്രി എട്ടിനാണ് അണ്ണാ സര്‍വകലാശാല കാംപസില്‍വെച്ച് രണ്ടാം വര്‍ഷ ബിരുദ വിദ്യാര്‍ഥിനി ക്രൂരപീഡനത്തിന് ഇരയായത്. രണ്ടുപേര്‍ ചേര്‍ന്ന് പെണ്‍കുട്ടിയെ വലിച്ചിഴച്ച് കൊണ്ടുപോയി ബലാത്സംഗം ചെയ്യുകയായിരുന്നു. സംഭവവുമായി ബന്ധപ്പെട്ട് ഒരാളെ അറസ്റ്റ് ചെയ്തതായി പൊലിസ് അറിയിച്ചിരുന്നു.