ബംഗളുരു:ഡോ. രാജ്കുമാര്‍ റോഡ് നവരംഗ് ബാര്‍ ജങ്ഷനിലെ  ഇലക്ട്രിക് സ്‌കൂട്ടര്‍ ഷോറൂമിന് തീപിടിച്ച് ജീവനക്കാരി വെന്തുമരിച്ചു. ഇവിടുത്തെ കാഷ്യറായ രാമചന്ദ്രപുര സ്വദേശിനി പ്രിയ(20) ആണ് മരിച്ചത്. തീപിടിത്തത്തില്‍ 45 ഇരുചക്രവാഹനങ്ങള്‍ കത്തിനശിച്ചു. 

ചൊവ്വാഴ്ച്ച വൈകീട്ടായിരുന്നു സംഭവം. ഷോര്‍ട്ട് സര്‍ക്ക്യൂട്ടിനെത്തുടര്‍ന്നാണ് തീപടര്‍ന്നതെന്നാണ് പ്രാഥമിക നിഗമനം. തീപിടിത്തമുണ്ടായപ്പോള്‍ ഷോറൂമില്‍ ആറ് ജീവനക്കാരാണ് ഉണ്ടായിരുന്നത്. ഈ സമയം കാഷ്യര്‍ റൂമിലായിരുന്ന പ്രിയയ്ക്ക് തീയും കനത്ത പുകയും കാരണം പുറത്തിറങ്ങാന്‍ സാധിച്ചില്ല. അഗ്നിരക്ഷാ സേനയെത്തിയാണ് മൃതദേഹം പുറത്തെടുത്തത്. രാത്രി ഏറെ വൈകിയാണ് തീ നിയന്ത്രണവിധേയമാക്കാന്‍ സാധിച്ചത്. 

സംഭവശേഷം ഷോറൂം ഉടമ ഒളിവില്‍ പോയെന്നാണ് പൊലിസ് പറയുന്നത്. പൊലിസ് കേസെടുത്ത് അന്വേഷണം ആരംഭിച്ചു.