തിരുവനന്തപുരം : തനിക്കെതിരായ രണ്ട് ലൈംഗികാതിക്രമ പരാതികളും വ്യാജമെന്ന് നടന്‍ ജയസൂര്യ. തിരുവനന്തപുരത്ത് നടന്ന ചോദ്യംചെയ്യലിന് ശേഷം മാധ്യമങ്ങളോട് സംസാരിക്കുകയായിരുന്നു നടന്‍. ആരോപണം ഉന്നയിച്ച സ്ത്രീ പറയുന്നത് 2013ല്‍ ഒരു സിനിമാ ചിത്രീകരണത്തിനിടെ അവര്‍ക്ക് ദുരനുഭവം ഉണ്ടായി എന്നാണ്. യഥാര്‍ത്ഥത്തില്‍ 2013-ല്‍ അങ്ങനെയൊരു സിനിമാ ചിത്രീകരണം ഉണ്ടായിട്ടില്ല. ഈ പറയുന്ന സിനിമ തൊടുപുഴയില്‍ വച്ചല്ല, കൂത്താട്ടുകുളത്ത് വെച്ചാണ് ചിത്രീകരിച്ചതെന്നും അദ്ദേഹം പറഞ്ഞു. 

സെക്രട്ടറിയേറ്റില്‍ വെച്ച് നടന്ന ഷൂട്ടിംഗിനിടെ ലൈംഗികാതിക്രമം നടത്തിയെന്ന് പരാതി നല്‍കിയ നടിയുമായി ഒരു സൗഹൃദവുമില്ല. 2008 ല്‍ രണ്ട് മണിക്കൂര്‍ മാത്രമായിരുന്നു സെക്രട്ടറിയേറ്റില്‍ ഷൂട്ടിംഗ് അനുമതി ഉണ്ടായിരുന്നത്. പരാതിക്കാരി ആരോപിച്ച സ്ഥലത്തായിരുന്നില്ല, താഴത്തെ നിലയിലായിരുന്നു ഷൂട്ടിംഗ് നടന്നതെന്നും പരാതി വ്യാജമാണെന്നും ജയസൂര്യ പ്രതികരിച്ചു. 

അന്വേഷണവുമായി സഹകരിക്കുന്നുണ്ടെന്നും തന്റെ അറസ്റ്റ് രേഖപ്പെടുത്തിയിട്ടില്ലെന്നും ജയസൂര്യ പ്രതികരിച്ചു. ഇത്തരം വ്യാജ ആരോപണങ്ങളുടെ ജീവിച്ചിരിക്കുന്ന രക്തസാക്ഷിയാണു താനെന്നും അദ്ദേഹം പ്രതികരിച്ചു.