പട്‌ന: ബിഹാറില്‍ 21 ദലിത് കുടുംബങ്ങളുടെ വീടുകള്‍ക്ക് തീയിട്ട് അക്രമികള്‍. നവാദ ജില്ലയിലാണ് സംഭവം. ആദ്യം പുറത്ത് വന്ന വിവരപ്രകാരം 80 വീടുകള്‍ക്ക് തീയിട്ടുവെന്നാണ് റിപ്പോര്‍ട്ട്. എന്നാല്‍, പിന്നീട് 21 വീടുകള്‍ക്ക് മാത്രമാണ് തീയിട്ടതെന്ന് പൊലിസ് അറിയിക്കുകയായിരുന്നു. കൂടുതല്‍ സംഘര്‍ഷ സാധ്യത ഉണ്ടാകാതിരിക്കാന്‍ പ്രദേശത്ത് വന്‍ പൊലിസ് സംഘത്തെ വിന്യസിച്ചിട്ടുണ്ട്.

വസ്തുതര്‍ക്കത്തിന്റെ പേരിലാണ് വീടുകള്‍ക്ക് തീയിട്ടതെന്നാണ് പൊലിസ് പറയുന്നത്. സംഭവത്തില്‍ പ്രധാന പ്രതി ഉള്‍പ്പടെ 15 പേര്‍ അറസ്റ്റിലായെന്നും പൊലിസ് വ്യക്തമാക്കുന്നു. ബിഹാറില്‍ ജംഗിള്‍ രാജാണ് നിലനില്‍ക്കുന്നതെന്നതിന്റെ ഉത്തമ ഉദാഹരണമാണ് സംഭവമെന്നും കോണ്‍ഗ്രസ് വ്യക്തമാക്കി.

തങ്ങളുടെ താമസസ്ഥലത്തേക്ക് ഇരച്ചുകയറിയെത്തി അക്രമികള്‍ നിരവധി കുടുംബങ്ങളെ മര്‍ദിക്കുകയും വീടുകള്‍ക്ക് തീയിടുകയും ചെയ്തുവെന്ന് ഗ്രാമീണര്‍ പറഞ്ഞു. അക്രമികള്‍ ആകാശത്തേക്ക് വെടിവെക്കുകയും ചെയ്തു. 

സംഭവത്തിന് പിന്നാലെ ബിഹാര്‍ മുഖ്യമന്ത്രി നിതീഷ് കുമാര്‍ ഉന്നതതല യോഗം വിളിച്ചിട്ടുണ്ട്. സംഭവത്തില്‍ അന്വേഷണം നടത്താന്‍ പ്രത്യേക സംഘത്തേയും നിയോഗിച്ചിട്ടുണ്ട്.