മംഗള, നേത്രാവതി ട്രെയിനുകളിൽ വൈകിട്ട് ഹ്രസ്വദൂര യാത്രക്കാർ അനുഭവിച്ചിരുന്ന തിരക്കിന് അൽപാശ്വാസമായിരുന്നു പുതിയ പാസഞ്ചർ ട്രെയിൻ. വൈകിട്ടുള്ള തിരുവനന്തപുരം-മുംബൈ നേത്രാവതി എക്‌സ്പ്രസിലെ റിസർവ് കോച്ചിലെ ജനറൽ ടിക്കറ്റുകാരുടെ തിരക്കും ഷൊർണ്ണൂർ- കണ്ണൂർ പാസഞ്ചറിന്റെ വരവോടെ കുറഞ്ഞിരുന്നു. രാവിലെയും വൈകിട്ടുമുള്ള സ്ഥിരം യാത്രക്കാർ നിരവധിയായതിനാൽ റെയിൽവേക്ക് നല്ലരീതിയിൽ വരുമാനവും ലഭിച്ചിരുന്നു.

ഷൊർണൂര് നിന്നും കണ്ണൂരേക്കുള്ള സർവീസ് ചൊവ്വ, ബുധൻ, വ്യാഴം, വെള്ളി ദിവസങ്ങളിലും കണ്ണൂര് നിന്ന് ഷൊർണൂരേക്കുള്ള സർവീസ് ബുധൻ, വ്യാഴം, വെള്ളി, ശനി ദിവസങ്ങളിലുമാണ് നടന്നിരുന്നത്. ചൊവ്വ, ബുധൻ, വ്യാഴം, വെള്ളി ദിവസങ്ങളിൽ ഉച്ചയ്ക്ക് 3.40നു ഷൊർണൂരിൽ നിന്നു ട്രെയിൻ യാത്ര തുടങ്ങും. 4.13നു കുറ്റിപ്പുറത്തെത്തും. 4.31നു തിരൂർ, 4.41നു താനൂർ, 4.49നു പരപ്പനങ്ങാടി എന്നിവിടങ്ങളിലെത്തുന്ന ട്രെയിൻ വൈകിട്ട് 5.30നു കോഴിക്കോട്ടെത്തും. രാത്രി 7.40നു കണ്ണൂരിൽ യാത്ര അവസാനിപ്പിക്കും. രാവിലെ 8.10ന് കണ്ണൂരിൽ നിന്നെടുക്കുന്ന ട്രെയിൻ 9.45ന് കോഴിക്കോടെത്തും. 10.17ന് പരപ്പനങ്ങാടി, 10.26ന് താനൂർ, 10.34ന് തിരൂർ, 10.49ന് കുറ്റിപ്പുറം എന്നീ സ്റ്റേഷനുകളിലെത്തുന്ന ട്രെയിൻ 12.30ന് ഷൊർണൂരിലെത്തി യാത്ര അവസാനിപ്പിക്കും. വിദ്യാർഥികളും ഉദ്യോഗസ്ഥരും ആശുപത്രി ആവശ്യങ്ങൾക്കും മറ്റുമായി പോകുന്ന യാത്രക്കാരും അടങ്ങുന്ന വലിയൊരു വിഭാഗത്തിന് അനുകൂലമായ സമയക്രമീകരണമായിരുന്നതിനാൽ യാത്രക്കാർക്കും പാസഞ്ചർ വലിയ ആശ്വാസമായിരുന്നു.