മദീന: ഉംറ വിസയിലെത്തിയ മലയാളി തീര്‍ഥാടക മദീനയില്‍ ഹൃദയാഘാതം മൂലം മരിച്ചു. മലപ്പുറം, കൊണ്ടോട്ടി മേലങ്ങാടി സ്വദേശിനി വീട്ടില്‍ ഖദീജ (72) ആണ് മരിച്ചത്. പുത്തന്‍മാളിയക്കല്‍ ചോനങ്ങല്‍ കുടുംബാംഗമാണ്. ഉംറ തീര്‍ഥാടനത്തിനായി മകന്‍ റഫീഖിനൊപ്പമാണ് ഖദീജ സഊദിയില്‍ എത്തിയത്. മക്കയില്‍വച്ച് ഉംറ നിര്‍വഹിച്ചതിനു ശേഷം മദീനയില്‍ പ്രവാചക പള്ളി (മസ്ജിദുന്നബവി) സന്ദര്‍ശിക്കാനെത്തിയപ്പോഴാണ് ഖദീജക്ക് ഹൃദയാഘാതം അനുഭവപ്പെട്ടത്.
താമസ സ്ഥലത്തു വച്ച് ദേഹാസ്വാസ്ഥ്യം അനുഭവപ്പെട്ടതിനെ തുടര്‍ന്ന് ഖദീജയെ ആശുപത്രിയിലേക്ക് കൊണ്ടു പോകുന്ന വഴിയില്‍ ആംബുലന്‍സില്‍ വച്ചു തന്നെ മരണം സംഭവിക്കുയായിരുന്നു. 
ഭര്‍ത്താവ്: പരേതനായ വീരാന്‍. 
മറ്റുമക്കള്‍: അബ്ദുല്‍ മജീദ്, ലീയാക്കത്തലി, മുഹമ്മദ് റഷീദ്, മുഹമ്മദ് റാഫി, സാഹിറാ ബാനു, റഹ്മത്ത് ബീവി, നദീറ, നസീബ, സമീറ, നുസ്‌റത്ത്, പരേതനായ അബ്ദുല്‍ നാസര്‍.
മയ്യിത്ത് അല്‍മീഖാത് ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്. നിയമനടപടികള്‍ പൂര്‍ത്തിയാക്കി മറവുചെയ്യും. മുഹമ്മദ് ഷഫീഖ് മൂവാറ്റപുഴയുടെ നേതൃത്വത്തില്‍ മദീന കെഎംസിസി വെല്‍ഫെയര്‍ വിങ് ആണ് നടപടികള്‍ പൂര്‍ത്തിയാക്കുന്നത്.

Malayali pilgrim on Umrah visa dies of heart attack in Medina