ഗസ്സ:  വെടിനിര്‍ത്തല്‍ നടപ്പാക്കാന്‍ ആയുധം താഴെവെക്കണമെന്ന ഇസ്‌റാഈലിന്റെ ആവശ്യം തള്ളി ഹമാസ്. ഇതൊരിക്കലും സ്വീകര്യമല്ല. അധിനിവേശകര്‍ക്കു മുന്നില്‍ ഞങ്ങള്‍ കീഴടങ്ങുമെന്ന് അവര്‍ കരുതേണ്ട. അതൊരിക്കലും സംഭവിക്കാന്‍ പോകുന്നില്ല- ഹമാസ് വ്യക്തമാക്കി. അങ്ങനെ ഒരാവശ്യം കേള്‍ക്കുന്നത് പോലും ഞങ്ങള്‍ക്ക് അംഗീകരിക്കാന്‍ കഴിയാത്തതാണ്- ഹമാസ് വക്താവ് ഡോ. സാമി അബു സുഹ്‌രി അല്‍ജസീറയോട് പറഞ്ഞു. 

'ഞങ്ങളുടെ ജനങ്ങളുടെ ദുരിതം ലഘൂകരിക്കുന്ന എല്ലാ വാഗ്ദാനങ്ങള്‍ക്കും ഞങ്ങള്‍ തയ്യാറാണ്. എന്നാല്‍ നെതന്യാഹു ആവശ്യപ്പെടുന്നത് കീഴടങ്ങല്‍ കരാറാണ്. 

ഏതൊരു വെടിനിര്‍ത്തല്‍ കരാറും അട്ടിമറിക്കാന്‍ നെതന്യാഹു അസാധ്യമായ വ്യവസ്ഥകള്‍ സൃഷ്ടിക്കുകയാണ്. പ്രതിരോധ സംഘത്തെ നിരായുധീകരിക്കു എന്നത് ചര്‍ച്ചക്ക് പോലും വരേണ്ട കാര്യമല്ല. അങ്ങിനെയൊട്ട് സംഭവിക്കാനും പോകുന്നില്ല- അല്‍ ജസീറയോടുള്ള പ്രതികരണത്തില്‍ ഡോ. സാമി വ്യക്തമാക്കി. 

പ്രതിരോധ ആയുധങ്ങളുടെ നിലനില്‍പ്പ് എന്ന് പറയുന്നത്.  അധിനിവേശത്തിന്റെ തുടര്‍ച്ചയുമായി ബന്ധപ്പെട്ടിരിക്കുന്നു. ഞങ്ങളുടെ ജനങ്ങളെയും ഞങ്ങളുടെ ദേശീയ അവകാശങ്ങളെയും സംരക്ഷിക്കുന്നതിനാണ് പ്രതിരോധ സംഘങ്ങള്‍ നിലനില്‍ക്കുന്നത്.

ഇസ്‌റാഈല്‍ അധിനിവേശകര്‍ യുദ്ധം പൂര്‍ണ്ണമായി അവസാനിപ്പിക്കാന്‍ പ്രതിജ്ഞാബദ്ധമല്ല എന്ന സന്ദേശമാണ് അവരുടെ ഏറ്റവും പുതിയ നിര്‍ദ്ദേശത്തില്‍ നല്‍കുന്നത്. ബന്ദികളുടെ മോചനം മാത്രമാണ് അവര്‍ ആഗ്രഹിക്കുന്നത്. 

യുദ്ധം അവസാനിപ്പിക്കുന്നതിനും ഗസ്സ മുനമ്പില്‍ നിന്ന് പിന്‍വാങ്ങുന്നതിനും പകരമായി ജീവിച്ചിരിക്കുന്നതും മരിച്ചതുമായ മുഴുവന്‍ ബന്ദികളേയും ഒരേസമയം മോചിപ്പിക്കാന്‍ ഞങ്ങള്‍ തയ്യാറാണ്. ഗസ്സന്‍ ജനതയെ കൊന്നൊടുക്കുന്നതില്‍ നെതന്യാഹുവിന്റെ പങ്കാളിയാണ് ട്രംപ്. 

നെതന്യാഹു സ്വന്തം രാഷ്ട്രീയ താല്‍പര്യമനുസരിച്ചാണ് പ്രവര്‍ത്തിക്കുന്നത്. യു.എസ് ഭരണകൂടവുമായി നിലവില്‍ നേരിട്ട് ആശയവിനിമയമില്ല. ഇപ്പോള്‍ വന്നിരിക്കുന്ന നിര്‍ദ്ദേശം ഇസ്‌റാഈലി നിര്‍ദ്ദേശമാണ്. ഞങ്ങളുടെ നിരായുധീകരണമാണ് അതിലവര്‍ ആദ്യം മുന്നോട്ട് വെച്ച വ്യവസ്ഥ. 

കീഴടങ്ങുക എന്നത് ഹമാസ് പ്രസ്ഥാനത്തിന്റെ ഓപ്ഷനല്ല. ഞങ്ങളുടെ ജനതയുടെ ആഗ്രഹം തകര്‍ക്കാന്‍ ഞങ്ങള്‍ അനുവദിക്കില്ല. 

ഹമാസ് ഒരിക്കലും കീഴടങ്ങില്ല. ഒരിക്കലും വെള്ളക്കൊടി ഉയര്‍ത്തില്ല. അധിനിവേശത്തിനെതിരെ സാധ്യമായ എല്ലാ സമ്മര്‍ദ്ദങ്ങളും ഞങ്ങള്‍  ഉപയോഗിക്കും. - ഹമാസ് വക്താവ് അല്‍ജസീറക്ക് നല്‍കിയ പ്രതികരണത്തില്‍ വ്യക്തമാക്കുന്നു. 

തിങ്കളാഴ്ചയും ശക്തമായ ആക്രമണമാണ് ഇസ്‌റാഈല്‍ ഗസ്സയില്‍ നടത്തിയത്. ചുരുങ്ങിയത് 15 പേരെങ്കിലും ആക്രമണങ്ങളില്‍ കൊല്ലപ്പെട്ടിരിക്കാമെന്നാണ് റിപ്പോര്‍ട്ട്. ഗസ്സയില്‍ ഇസ്‌റാഈല്‍ തുടരുന്ന ആക്രമണങ്ങളില്‍ ഇതുവരെ 50,983 പേര്‍ കൊല്ലപ്പെട്ടുവെന്നാണ് ആരോഗ്യമന്ത്രാലയം നല്‍കുന്ന ഔദ്യോഗിക കണക്ക്. 116,274 പേര്‍ക്ക് പരുക്കേറ്റതായും കണക്കുകള്‍ വ്യക്തമാക്കുന്നു. അതേസമയം, കെട്ടിടാവശിഷ്ടങ്ങള്‍ക്കിടയില്‍ കുടുങ്ങിയവരെ മരിച്ചതായി കണക്കാക്കിയാല്‍ മരണം 61,700 കടക്കുമെന്ന് ഗവര്‍മെന്റ് മീഡിയ ഓഫിസ് വ്യക്തമാക്കുന്നു.