രാജസ്ഥാൻ റോയൽസിൽ ഇംഗ്ലണ്ട് സൂപ്പർതാരം ജോസ് ബട്ലറിനൊപ്പമുള്ള വൈകാരികമായ ബന്ധത്തെക്കുറിച്ച് സംസാരിക്കുകയാണ് മലയാളി സൂപ്പർതാരം സഞ്ജു സാംസൺ. 2025  മെഗാ ലേലത്തിൽ ബട്ലറിനെ ടീം നിലനിർത്താത്തത് വലിയ വെല്ലുവിളി നിറഞ്ഞ തീരുമാനമായിരുന്നുവെന്നും കളിക്കളത്തിൽ തന്നെ മികച്ചൊരു ക്യാപ്റ്റനാക്കാൻ സഹായിച്ചത് ബട്ലർ ആണെന്നുമാണ് സഞ്ജു പറഞ്ഞത്. ജിയോ ഹോട്സ്റ്റാറിലൂടെ സംസാരിക്കുകയായിരുന്നു സഞ്ജു സാംസൺ. 

"ഒരു ടീമിനെ നയിക്കാനും മികച്ച രീതിയിൽ കളിക്കാനുള്ള അവസരം ഐപിഎൽ നൽകുന്നുണ്ട്. ഇതിനു പുറമേ അടുത്ത സൗഹൃദങ്ങൾ കെട്ടിപ്പടുത്തുയർത്താനും ഐപിഎൽ സഹായിക്കും. ജോസ് ബട്ലർ എന്റെ ഏറ്റവും അടുത്ത സുഹൃത്തുക്കളിൽ ഒരാളാണ്. ഞങ്ങൾ ഏഴു വർഷത്തോളം ഒരുമിച്ചു കളിച്ചു. ഇക്കാലയളവിൽ എല്ലാം ഞങ്ങളുടെ ബാറ്റിംഗ് കൂട്ടുകെട്ട് വളരെ മികച്ചതായിരുന്നു. ഞങ്ങൾ തമ്മിൽ പരസ്പരം കൂടുതൽ അറിയാൻ ഇത് സഹായിച്ചു. അദ്ദേഹം എനിക്ക് ഒരു ബ്രദറിനെ പോലെയാണ്. കളിക്കളത്തിൽ സംശയങ്ങൾ തോന്നുമ്പോൾ എല്ലാം ഞാൻ അദ്ദേഹത്തോട് സംസാരിക്കുമായിരുന്നു. ഞാൻ രാജസ്ഥാന്റെ ക്യാപ്റ്റനായപ്പോൾ അദ്ദേഹം എന്റെ കൂടെ വൈസ് ക്യാപ്റ്റനായി ഉണ്ടായിരുന്നു. എന്നെ ഒരു മികച്ച ക്യാപ്റ്റനാകാൻ അദ്ദേഹം സഹായിച്ചു. അദ്ദേഹത്തെ ടീമിൽ നിന്നും വിട്ടയക്കുക എന്നത് ഏറ്റവും വലിയ വെല്ലുവിളി നിറഞ്ഞ തീരുമാനങ്ങളിൽ ഒന്നായിരുന്നു" സഞ്ജു സാംസൺ പറഞ്ഞു. 

2025 ഐപിഎല്ലിൽ  ബട്ലറിനെ രാജസ്ഥാൻ റോയൽസ് നിലനിർത്താതെ പോവുകയായിരുന്നു. ടീമിന്റെ പല വിജയത്തിലും ശ്രദ്ധേയമായ പ്രകടനങ്ങൾ നടത്തിയ ബട്ലറിനെപ്പോലൊരു താരത്തെ രാജസ്ഥാൻ നിലനിർത്താത്തത് ആരാധകർക്കിടയിൽ വലിയ ഞെട്ടലാണ് ഉണ്ടാക്കിയിരുന്നത്. രാജസ്ഥാൻ റോയൽസിന് വേണ്ടി 83 മത്സരങ്ങളിൽ നിന്നും 3055 റൺസാണ് ഇംഗ്ലണ്ട് താരം അടിച്ചെടുത്തത്. മേഘാലയളത്തിൽ ഗുജറാത്ത് ടൈറ്റൻസ് 15.75 കോടി രൂപക്കാണ് ബട്ലറിനെ സ്വന്തമാക്കിയത്. സഞ്ജു സാംസൺ, റിയാൻ പരാഗ്, ധ്രുവ് ജുറൽ, ഷിംറോൺ ഹെറ്റ്മെയർ, സന്ദീപ് ശർമ എന്നിവരെയായിരുന്നു രാജസ്ഥാൻ നിലനിർത്തിയിരുന്നത്.

2008ൽ ഐപിഎൽ കിരീടം നേടിയതിന് ശേഷം ഒരിക്കൽ പോലും രാജസ്ഥാന് ഇന്ത്യൻ ക്രിക്കറ്റിന്റെ നെറുകയിൽ എത്താൻ സാധിച്ചിട്ടില്ല. മൂന്ന് വർഷം മുമ്പത്തെ സീസണിൽ ഫൈനൽ വരെ മുന്നേറാൻ രാജസ്ഥാന് സാധിച്ചിരുന്നു. എന്നാൽ കലാശപ്പോരാട്ടത്തിൽ ഗുജറാത്ത് ജയന്റ്സിനോട് പരാജയപ്പെട്ട് സഞ്ജുവിനും സംഘത്തിനും കിരീടം നഷ്ടമാവുകയായിരുന്നു. അതുകൊണ്ട് തന്നെ നീണ്ട വർഷകാലത്തെ രാജസ്ഥാന്റെ കിരീട സ്വപ്നങ്ങൾ അവസാനിപ്പിക്കാൻ ആയിരിക്കും രാജസ്ഥാൻ ഈ സീസണിൽ കളത്തിൽ ഇറങ്ങുന്നത്.