തട്ടിപ്പുകോളുകള്‍ തിരിച്ചറിയാനും തടയാനുമായി വാട്‌സ്ആപ്പില്‍ പുതിയ ഫീച്ചര്‍. വിഡിയോ കോളുകള്‍ എടുക്കുന്നതിന് മുമ്പ് കാമറ ഓഫ് ആകുന്നതാണ് പുതിയ ഫീച്ചര്‍ എന്നാണ് റിപ്പോര്‍ട്ടുകള്‍. അതേസമയം നിലവില്‍ വാട്‌സ്ആപ്പ് ഈ ഫീച്ചറിന്റെ പരീക്ഷണ ഘട്ടത്തിലാണ്. 

സാധാരണ നിലയില്‍ വാട്‌സ്ആപ്പില്‍ വിഡിയോ കോള്‍ വരുമ്പോള്‍ ഉപയോക്താക്കളുടെ ഫ്രണ്ട് കാമറകള്‍ ഓട്ടോമാറ്റിക്കായി ഓണ്‍ ആകാറുണ്ട്. ഇത് അനുവാദമില്ലാതെ തന്നെ സ്വീകര്‍ത്താവിന്റെ ദൃശ്യങ്ങള്‍ പകര്‍ത്തുകയും ചെയ്യും. എന്നാല്‍ പുതിയ ഫീച്ചര്‍ വരുന്നതോടെ വിഡിയോ കോളുകള്‍ വരുമ്പോള്‍ കാമറ അല്ലെങ്കില്‍ വിഡിയോ ഓഫ് ആക്കാനുള്ള ഓപ്ഷനും വിഡിയോ ഇല്ലാതെ കോള്‍ എടുക്കാനുള്ള ഫീച്ചറും ലഭ്യമാകും.

ഉപയോക്താക്കളുടെ സ്വകാര്യത കൂടുതല്‍ ഉറപ്പാക്കുന്നതിനായാണ് ഇത്തരത്തിലുള്ള ഫീച്ചറുകള്‍ കമ്പനി അവതരിപ്പിക്കുന്നത്. കൂടാതെ തട്ടിപ്പുകാര്‍ വിഡിയോ കോളുകള്‍ വഴി അനുവാദമില്ലാതെ ഉപയോക്താക്കളുടെ ചിത്രങ്ങള്‍ സ്‌ക്രീന്‍ഷോട്ട് വഴി പകര്‍ത്തുന്നത് ഈ ഫീച്ചര്‍ തടയും.

അതേസമയം വാട്‌സ്ആപ്പ് ഉടന്‍ തന്നെ യുപിഐ ലൈറ്റ് ഫീച്ചര്‍ അവതരിപ്പിക്കുമെന്നും റിപ്പോര്‍ട്ടുകള്‍. പുതിയ ബീറ്റാ പതിപ്പ് 2.25.5.17 ഉപയോഗിക്കുന്നവര്‍ക്കായിരിക്കും പരീക്ഷണാടിസ്ഥാനത്തില്‍ ഈ ഫീച്ചറുകള്‍ ലഭ്യമാകുകയെന്നാണ് അറിയുന്നത്.

ചെറുകിട ഇടപാടുകള്‍ പിന്‍രഹിതമായും, ഇന്റര്‍നെറ്റ് കണക്ഷനില്ലാതെയും നിര്‍വഹിക്കാന്‍ കഴിയുന്നതാണ് യുപിഐ ലൈറ്റിന്റെ പ്രധാന സവിശേഷത. പുതിയ വാട്‌സ്ആപ്പിന്റെ പ്രവര്‍ത്തനം എന്‍പിസിഐയുടെ യുപിഐ സിസ്റ്റത്തിന്റെ അടിസ്ഥാനത്തിലായിരിക്കും. ഉപഭോക്താക്കള്‍ക്ക് പിന്‍ ഉപയോഗിക്കാതെ വേഗത്തിലും സൗകര്യപ്രദമായും പണമിടപാട് നടത്താന്‍ ഇതിലൂടെ സാധിക്കും.  

വാട്‌സ്ആപ്പിന്റെ പുതിയ ഫീച്ചര്‍ വഴി പ്രത്യേക വാലറ്റിലേക്ക് പണം നിക്ഷേപിക്കാനും പിന്‍വലിക്കാനും കഴിയും. ഗൂഗിള്‍ പേ, ഫോണ്‍ പേ, പേടിഎം തുടങ്ങിയ പേയ്‌മെന്റ് ആപ്പുകളുമായി മത്സരിക്കാനാണ് വാട്‌സ്ആപ്പിന്റെ ഈ നീക്കം. നിലവില്‍ പരീക്ഷണാടിസ്ഥാനത്തില്‍ ആരംഭിച്ച ഈ ഫീച്ചര്‍ ഒരു വിജയമായാല്‍, ഇത് കൂടുതല്‍ ഉപയോക്താക്കളിലേക്ക് വ്യാപിപ്പിക്കാനാണ് വാട്‌സ്ആപ്പ് പദ്ധതിയിടുന്നത്.