ദുബൈ: ഇന്ത്യൻ ക്യാപ്റ്റൻ രോഹിത് ശർമ്മയെ പ്രശംസിച്ചുകൊണ്ട് സംസാരിക്കുകയാണ് മുൻ സൗത്ത് ആഫ്രിക്കൻ വെടിക്കെട്ട് ബാറ്റർ എബി ഡിവില്ലിയേഴ്സ്. രോഹിത് ക്രിക്കറ്റിൽ നിന്നും വിരമിക്കാൻ സമയമായില്ലെന്നും ചാമ്പ്യൻസ് ട്രോഫിയിൽ മികച്ച പ്രകടനമാണ് രോഹിത് നടത്തിയതെന്നുമാണ് ഡിവില്ലിയേഴ്സ് പറഞ്ഞത്. തന്റെ യുട്യൂബ് ചാനലിലൂടെയാണ് മുൻ സൗത്ത് ആഫ്രിക്കൻ താരം ഇക്കാര്യം പറഞ്ഞത്. 

'എന്തിനാണ് രോഹിത് വിരമിക്കുന്നത്? ക്യാപ്റ്റനെന്ന നിലയിൽ മാത്രമല്ല ബാറ്ററായും അദ്ദേഹം മികച്ച പ്രകടനമാണ് നടത്തിയത്. ചാമ്പ്യൻസ് ട്രോഫി ഫൈനലിൽ അദ്ദേഹം 76 റൺസ് നേടി ഇന്ത്യയ്ക്ക് മികച്ച തുടക്കമാണ് നൽകിയത്. ഇന്ത്യയുടെ വിജയത്തിന് വലിയ അടിത്തറയാണ് രോഹിത് നൽകിയത്. ടീമിനെ മുന്നിൽ നിന്നും നയിക്കുകയും ചെയ്തു. അതുകൊണ്ട് തന്നെ രോഹിത് വിരമിക്കാനായി ഒരു കാരണവുമില്ല. ഒരു വിമർശനങ്ങളും അദ്ദേഹം സ്വീകരിക്കേണ്ട ആവശ്യവുമില്ല. അദ്ദേഹത്തിന്റെ സ്ട്രൈക്ക് വളരെ മികച്ചതാണ്. 2022 മുതൽ പവർ പ്ലേയിൽ അദ്ദേഹത്തിന്റെ സ്ട്രൈക്ക് റേറ്റ് 115 ആയാണ് ഉയർന്നത്. രോഹിത് ഒരു മത്സരത്തെ എപ്പോഴും മാറ്റിമറിക്കും,' ഡി വില്ലിയേഴ്‌സ് പറഞ്ഞു.      

ചാമ്പ്യൻസ് ട്രോഫി വിജയത്തിന് ശേഷം ഏകദിന ക്രിക്കറ്റിൽ നിന്നും താൻ ഇപ്പോൾ താൻ വിരമിക്കുന്നില്ലെന്നാണ് രോഹിത് പറഞ്ഞത്. താൻ ഏകദിന ക്രിക്കറ്റിൽ നിന്നും വിരമിക്കാൻ ഉദ്ദേശിച്ചിട്ടില്ലെന്നും ഇപ്പോൾ ഭാവിയെക്കുറിച്ചുള്ള പദ്ധതികൾ ഒന്നും തന്നെയില്ലെന്നുമാണ് രോഹിത് മത്സരശേഷം പറഞ്ഞത്. 

ഫൈനലിൽ രോഹിത് ശർമ അർദ്ധ സെഞ്ച്വറി നേടിയാണ് തിളങ്ങിയത്. 83 പന്തിൽ 73 റൺസാണ് താരം നേടിയത്. ഏഴ് ഫോറുകളും മൂന്ന് സിക്സുകളുമാണ്‌ ഇന്ത്യൻ നായകന്റെ ബാറ്റിൽ നിന്നും പിറന്നത്. ഈ തകർപ്പൻ പ്രകടനങ്ങൾക്ക് പിന്നാലെ മത്സരത്തിലെ പ്ലയെർ ഓഫ് ദി മാച്ച് അവാർഡും രോഹിത് സ്വന്തമാക്കിയിരുന്നു. ഐസിസിയുടെ ഏകദിന ടൂർണമെന്റുകളിൽ ഫൈനലിൽ അർദ്ധ സെഞ്ച്വറി നേടുന്ന മൂന്നാമത്തെ ഇന്ത്യൻ ക്യാപ്റ്റനായി മാറാനും രോഹിത്തിന് സാധിച്ചിരുന്നു. സൗരവ് ഗാംഗുലിയും എംഎസ് ധോണിയും ആണ് ഇതിന് മുമ്പ് ഈ നേട്ടത്തിലെത്തിയ ഇന്ത്യൻ ക്യാപ്റ്റൻമാർ. 

ഫൈനലിൽ ന്യൂസിലാന്റിനെ നാല് വിക്കറ്റുകൾക്ക് പരാജയപ്പെടുത്തിയാണ് ഇന്ത്യ ചാമ്പ്യൻസ് ട്രോഫി കിരീടം സ്വന്തമാക്കിയിരുന്നത്. മത്സരത്തിൽ ആദ്യം ബാറ്റ് ചെയ്ത കിവീസ് ഏഴ് വിക്കറ്റ് നഷ്ടത്തിൽ 251 റൺസാണ് നേടിയത്. വിജയലക്ഷ്യം പിന്തുടർന്നിറങ്ങിയ ഇന്ത്യ ആറ് വിക്കറ്റ് നഷ്ടത്തിൽ ലക്ഷ്യം മറികടക്കുകയായിരുന്നു. ഇന്ത്യയുടെ മൂന്നാം ചാംപ്യൻസ്‌ ട്രോഫി കിരീടനേട്ടമാണിത്. 2002, 2013 എന്നീ വർഷങ്ങളിലായിരുന്നു ഇന്ത്യ ഇതിനു മുമ്പ് ചാമ്പ്യൻസ് ട്രോഫി സ്വന്തമാക്കിയിരുന്നത്.