രണ്ട് പതിറ്റാണ്ടുകളായി ഫുട്ബോൾ ലോകത്ത് ശക്തമായ ആധിപത്യം പുലർത്തുന്ന ഇതിഹാസതാരങ്ങളാണ് ലയണൽ മെസിയും ക്രിസ്റ്റ്യാനോ റൊണാൾഡോയും. ഇവരിൽ ആരാണ് ഏറ്റവും മികച്ച താരം എന്നുള്ളത് എല്ലാക്കാലത്തും സജീവമായി നിലനിൽക്കുന്ന ചർച്ചാവിഷയമാണ്. ഇപ്പോൾ ഈ വിഷയത്തിൽ തന്റെ അഭിപ്രായം പറഞ്ഞിരിക്കുകയാണ് റയൽ മാഡ്രിഡിന്റെ എക്കാലത്തെയും മികച്ച ഇതിഹാസതാരങ്ങളിൽ ഒരാളായ മാഴ്സലൊ. ഫുട്ബോൾ ചരിത്രത്തിൽ ഏറ്റവും മികച്ചൊരു താരം ഉണ്ടെന്ന് താൻ വിശ്വസിക്കുന്നില്ലെന്നും  ഇരുവരുടെയും മത്സരം നേരിട്ട് കാണാൻ കഴിഞ്ഞത് ഭാഗ്യമായി കരുതണം എന്നുമാണ് മാഴ്സലൊ പറഞ്ഞത്. ലാ റെവുൽറ്റക്ക്‌ നൽകിയ അഭിമുഖത്തിലാണ് മാഴ്സലൊ ഇക്കാര്യം പറഞ്ഞത്. 

'ചരിത്രത്തിലെ ഏറ്റവും മികച്ച താരമോ? അങ്ങനെയൊരാൾ ഉണ്ടെന്ന് ഞാൻ കരുതുന്നില്ല. ക്രിസ്റ്റ്യാനോയുടെയും മെസിയുടെയും കാലഘട്ടത്തിൽ ഫുട്ബോൾ കളിക്കാൻ കഴിഞ്ഞതിൽ ഞങ്ങൾ ഭാഗ്യവാന്മാരാണ്. ഇരുവരെയും താരതമ്യം ചെയ്യുന്നത് എനിക്കിഷ്ടമല്ല. അവർ രണ്ട് പേരും അവിശ്വസനീയമായിരുന്നു. ഇവരോടൊപ്പം കളിക്കാൻ സാധിച്ചതിൽ ഞാൻ ഭാഗ്യവാനാണ്. മെസി രണ്ട് ഗോളുകൾ നേടുമ്പോൾ റൊണാൾഡോ മൂന്ന് ഗോൾ നേടും. പിന്നീട് മെസി നാല് ഗോളുകൾ നേടാൻ ആഗ്രഹിക്കും. പലരും ഇവരെ താരതമ്യം ചെയ്യാൻ ആഗ്രഹിക്കുന്നു. എന്നാൽ എല്ലാവരും ഇവരുടെ കളികൾ ആസ്വദിക്കാൻ മറക്കുകയാണ്,' മാഴ്സലൊ പറഞ്ഞു.

നിലവിൽ അമേരിക്കൻ ക്ലബ് ഇന്റർ മയാമിക്ക് വേണ്ടിയാണ് മെസി കളിക്കുന്നത്. മയാമിക്കൊപ്പം മിന്നും പ്രകടനമാണ് മെസി നടത്തിക്കൊണ്ടിരിക്കുന്നത്. 36 ഗോളുകളും 20 അസിസ്റ്റുകളും ആണ് മെസി ഇന്റർ മയാമിക്ക് വേണ്ടി നേടിയത്. മെസിയുടെ വരവോടെ ഇന്റർ മയാമി ലീഗിൽ മിന്നും പ്രകടനമായിരുന്നു നടത്തിയിരുന്നത്. ക്ലബ്ബിന്റെ ചരിത്രത്തിൽ ഇതുവരെ ഇല്ലാതിരുന്ന ലീഗ്‌സ് കപ്പ് കിരീടവും മെസിയുടെ നേതൃത്വത്തിൽ ആണ് മയാമി സ്വന്തമാക്കിയത്.

 റൊണാൾഡോ സഊദി പ്രൊ ലീഗ് ക്ലബായ അൽ നസറിന്റെ താരവുമാണ്. റൊണാൾഡോ 2023ൽ ആയിരുന്നു സഊദി ഫുട്ബോളിന്റെ ഭാഗമായത്. മാഞ്ചസ്റ്റർ യുണൈറ്റഡിൽ നിന്നുമാണ്  റൊണാൾഡോ അൽ നസറിലേക്ക് എത്തിയത്. റൊണാൾഡോക്ക് പിന്നാലെ യൂറോപ്പ്യൻ അധ്യായങ്ങൾക്ക് വിരാമമിട്ടുകൊണ്ട് പല സൂപ്പർതാരങ്ങളും സഊദിയുടെ മണ്ണിൽ എത്തിയിരുന്നു. അൽ നസറിന് വേണ്ടി ഇക്കാലയളവിലെല്ലാം തകർപ്പൻ ഫോമിലാണ് റൊണാൾഡോ കളിച്ചുകൊണ്ടിരിക്കുന്നത്.