ലണ്ടൻ: മാഞ്ചസ്റ്റർ സിറ്റി സൂപ്പർതാരം കെവിൻ ഡി ബ്രൂയ്നെ സ്വന്തമാക്കാൻ സഊദി വമ്പൻമാരായ അൽ നസർ ശ്രമിക്കുന്നതായി റിപ്പോർട്ടുകൾ. അൽ നസറിന് പുറമേ ഫ്രഞ്ച് ക്ലബ്ബ് പാരീസ് സെയ്ന്റ് ജെർമെയ്നും താരത്തെ സ്വന്തമാക്കാൻ താൽപ്പര്യം പ്രകടിപ്പിക്കുന്നുണ്ടെന്നും റിപ്പോർട്ടുകൾ നിലനിൽക്കുന്നുണ്ട്. നിലവിൽ ഡി ബ്രൂയ്ൻ മാഞ്ചസ്റ്റർ സിറ്റിക്കൊപ്പമുള്ള തന്റെ കരാർ പുതുക്കില്ലെന്നും ഈ വർഷം ജൂണിൽ ഫ്രീ ഏജന്റായി ടീം വിടാൻ ആഗ്രഹിക്കുന്നുവെന്നുമാണ് ലഭിക്കുന്ന വിവരങ്ങൾ. ബെൽജിയം സൂപ്പർതാരത്തെ ടീമിൽ എത്തിക്കാനായി അൽ നസർ 58 മില്യൺ പൗണ്ടിന്റെ കരാർ വാഗ്ദാനം ചെയ്തുവെന്നും റിപ്പോർട്ടുകൾ നിലനിൽക്കുന്നുണ്ട്. എന്നാൽ മറുഭാഗത്ത് പിഎസ്ജി 29 മില്യൺ ആണ് ഡി ബ്രൂയ്നെ സ്വന്തമാക്കാനായി മുന്നിൽ വെച്ചിട്ടുള്ള തുക.

മാഞ്ചസ്റ്റർ സിറ്റിക്കായി ഈ സീസണിൽ ഡി ബ്രൂയ്ൻ 18 മത്സരങ്ങളിലാണ് ബൂട്ട് കെട്ടിയത്. ഇതിൽ നാല് ഗോളുകളും ഏഴ് അസിസ്റ്റുകളുമാണ് താരം നേടിയിട്ടുള്ളത്. ഈ സീസണിൽ അത്ര മികച്ച പ്രകടനങ്ങളല്ല പെപ് ഗ്വാർഡിയോളയുടെ കീഴിൽ മാഞ്ചസ്റ്റർ സിറ്റി നടത്തുന്നത്. അടുത്തിടെ ചാമ്പ്യൻസ് ലീഗിൽ റയൽ മാഡ്രിഡിനോട് പരാജയപ്പെട്ട് സിറ്റി പുറത്തായിരുന്നു.

ഈ ട്രാൻസ്ഫർ നടന്നാൽ ഇതിഹാസ താരം ക്രിസ്റ്റ്യാനോ റൊണാൾഡോക്കൊപ്പം ഡി ബ്രൂയ്ൻ കളിക്കുന്നത് ഫുട്ബോൾ പ്രേമികൾക്ക് കാണാൻ സാധിക്കും. കൂടുതൽ താരങ്ങൾ സഊദി ലീഗിലേക്ക് കടന്നു വന്നാൽ ലീഗിന് ഇപ്പോൾ ലഭിക്കുന്നതിനേക്കാൾ വലിയ ശ്രദ്ധ പിടിച്ചുപറ്റാൻ സാധിക്കും. റൊണാൾഡോ 2023ൽ ആയിരുന്നു സഊദി ഫുട്ബോളിന്റെ ഭാഗമായത്. മാഞ്ചസ്റ്റർ യുണൈറ്റഡിൽ നിന്നുമാണ്  റൊണാൾഡോ അൽ നസറിലേക്ക് എത്തിയത്. 

റൊണാൾഡോക്ക് പിന്നാലെ യൂറോപ്പ്യൻ അധ്യായങ്ങൾക്ക് വിരാമമിട്ടുകൊണ്ട് പല സൂപ്പർതാരങ്ങളും സഊദിയുടെ മണ്ണിൽ എത്തിയിരുന്നു. കരിം ബെൻസിമ, സാദിയോ മാനെ, റിയാദ് മെഹറസ്, നെയ്മർ തുടങ്ങിയ മികച്ച താരങ്ങളായിരുന്നു സഊദിയിലേക്ക് കൂടുമാറിയത്. അൽ നസറിന് വേണ്ടി ഇക്കാലയളവിലെല്ലാം തകർപ്പൻ ഫോമിലാണ് റൊണാൾഡോ കളിച്ചുകൊണ്ടിരിക്കുന്നത്. 100 മത്സരങ്ങളിൽ നിന്നും 89 ഗോളുകളും 19 അസിസ്റ്റുകളുമാണ് റൊണാൾഡോ സ്വന്തമാക്കിയിട്ടുള്ളത്.