ദുബൈ: 45 വര്‍ഷമായി എമിറേറ്റില്‍ ജീവിച്ച ദുബൈ നിവാസിയായ വൃദ്ധയുടെ മരണത്തില്‍ അനുശോചിച്ച് ദുബൈ ഭരണാധികാരി ഷെയ്ഖ് മുഹമ്മദ് ബിന്‍ റാഷിദ് അല്‍ മഖ്തൂം. മരണപ്പെട്ട സ്ത്രീയുടെ പോസിറ്റീവിറ്റിയെയും ജീവിതകാലത്ത് കാത്തുസൂക്ഷിച്ച പ്രതീക്ഷാ മനോഭാവത്തെയും അദ്ദേഹം പ്രശംസിച്ചു.

'ഹലാ അല്‍ മെയ്ദാനി. അവര്‍ സിറിയയില്‍ നിന്നുള്ളവരായിരുന്നു, പഴയ ദുബൈ മാര്‍ക്കറ്റുകള്‍ക്ക് സമീപമുള്ള പതിവ് സ്ഥലത്ത് എപ്പോഴും ഇരിപ്പുറപ്പിക്കുന്നതിനാല്‍ ദുബൈയിലെ ജനങ്ങള്‍ക്ക് അവര്‍ പരിചിതയായിരുന്നു,' യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂം സന്ദേശത്തില്‍ കൂട്ടിച്ചേര്‍ത്തു

'അവളുടെ വലിയ പോസിറ്റീവിറ്റി, ജീവിതത്തോടുള്ള സ്‌നേഹം, ആളുകളോടുള്ള സ്‌നേഹം, പക്ഷികളെയും പൂച്ചകളെയും പോറ്റിയതും എല്ലാ ജീവജാലങ്ങളോടും വച്ചുപുലര്‍ത്തിയ സഹിഷ്ണുതയും കാരണം ആളുകള്‍ അവരെ സ്‌നേഹിച്ചു' എന്നും ഷെയ്ഖ് മുഹമ്മദ് പറഞ്ഞു.

هالة الميداني .. من سوريا الحبيبة .. 45 عاماً في دبي .. ألفها أهل دبي تجلس دائماً في منطقتها المعتادة عند أسواق دبي القديمة …

أحبها الناس بسبب إيجابيتها الكبيرة .. وحبها للحياة .. وحبها للناس .. و إطعامها للطيور والقطط وتسامحها مع جميع الكائنات ..

أحبت الجميع.. فأحبها الجميع… pic.twitter.com/PylkarkiLO

— HH Sheikh Mohammed (@HHShkMohd) February 22, 2025

'അവര്‍ എല്ലാവരെയും സ്‌നേഹിച്ചു, അതിനാല്‍ എല്ലാവരും അവരെ തിരിച്ചും സ്‌നേഹിച്ചു,' അദ്ദേഹം കൂട്ടിച്ചേര്‍ത്തു.തന്റെ എക്‌സ് അക്കൗണ്ടില്‍ അന്തരിച്ച സ്ത്രീയുടെ ഫോട്ടോ പോസ്റ്റ് ചെയ്ത ഷെയ്ഖ് മുഹമ്മദ് അല്‍ മെയ്ദാനിയുടെ ആത്മാവിന് വേണ്ടി പ്രാര്‍ത്ഥിക്കുകയും ചെയ്തു.

തന്റെ രാജ്യത്തെ സാധാരണക്കാരില്‍ സാധാരണക്കാരിയായ ഒരാളുടെ മരണം പോലും ഷെയ്ഖ് മുഹമ്മദ് ശ്രദ്ധിക്കുന്നതില്‍ അത്ഭുതം പ്രകടിപ്പിച്ച് നിരവധി പേരാണ് അദ്ദേഹത്തിന്റെ എക്‌സ് പോസ്റ്റില്‍ കമന്റു ചെയ്തത്. അല്‍ മെയ്ദാനിയെക്കുറിച്ച് പോസ്റ്റുചെയ്ത ദുബൈ ഭരണാധികാരിയെ നിരവധി പേരാണ് ഇതേ കാരണത്താല്‍ ഇപ്പോഴും അഭിനന്ദിച്ചുകൊണ്ടിരിക്കുന്നത്.

'All loved them exceedingly'; Sheikh Mohammed Sharing the pain of the death of an old woman who lived in Dubai for 45 years,