ലണ്ടൻ: ഇഎഫ്എൽ കപ്പ് സെമി ഫൈനൽ ആദ്യ ലെഗിൽ ലിവർപൂളിനെ എതിരില്ലാത്ത ഒരു ഗോളിന് ടോട്ടൻഹാം ഹോട്സ്പർ പരാജയപ്പെടുത്തിയിരുന്നു. മത്സരത്തിന്റെ ആദ്യ പകുതിയിൽ ഇരു ടീമുകൾക്കും ഗോൾ നേടാൻ സാധിച്ചിരുന്നില്ല. മത്സരത്തിന്റെ 86ാം മിനിറ്റിൽ ലൂക്കാസ് ബെർഗ്വാർ ആണ് സ്പർസിന്റെ വിജയഗോൾ നേടിയത്. ഈ ഗോൾ നേടിയതിനു പിന്നാലെ ഒരു തകർപ്പൻ നേട്ടവും താരം സ്വന്തമാക്കി. 

ടോട്ടൻഹാമിനായി ഇഎഫ്എൽ കപ്പിൽ ഗോൾ നേടുന്ന പ്രായം കുറഞ്ഞ താരമായി മാറാന് ലൂക്കാസ് ബെർഗ്വാറിന് സാധിച്ചത്. തന്റെ 18ാം വയസിലാണ് താരം ഈ നേട്ടം കൈപ്പിടിയിലാക്കിയത്.വെയ്ൽസ് സൂപ്പർതാരം ഗാരത് ബെയ്ലിന് ശേഷം ഈ നേട്ടം സ്വന്തമാക്കുന്ന താരം കൂടിയാണ് ലൂക്കാസ്. 2007ൽ മിഡിൽസ്ബ്രോഗിനെതിരെയായിരുന്നു ബെയ്ൽ ഗോൾ നേടിയത്.

മത്സരത്തിൽ ലിവർപൂൾ ആയിരുന്നു സർവമേഖലയിലും മുന്നിട്ടുനിന്നിരുന്നത്. മത്സരത്തിൽ 61 ശതമാനം ബോൾ പൊസഷൻ ആണ് ലിവർപൂൾ സ്വന്തമാക്കിയത്. 14 ഷോട്ടുകളാണ് ലിവർപൂൾ ടോട്ടൻഹാമിന്റെ പോസ്റ്റിലേക്ക് ഉതിർത്തത്. ഇതിൽ ഏഴ് ഷോട്ടുകൾ ഓൺ ടാർഗറ്റിലേക്ക് എത്തിക്കാനും ലിവർപൂളിന് സാധിച്ചു. 

ഫെബ്രുവരി ഏഴിനാണ് ഇഎഫ്എൽ കപ്പിന്റെ സെമി ഫൈനലിലെ സെക്കൻഡ് ലെഗ് പോരാട്ടം നടക്കുന്നത്. ലിവർപൂളിന്റെ തട്ടകമായ ആൻഫീൽഡിലാണ് മത്സരം നടക്കുക.