കോഴിക്കോട്: കരാർ ജീവനക്കാരും പ്രയോജനമില്ലാത്ത പദ്ധതികളും ഫണ്ട് വെട്ടിക്കുറക്കുന്നതും  കാരണം ന്യൂനപക്ഷ ക്ഷേമവകുപ്പിന്റെ പ്രവർത്തനം കാര്യക്ഷമമല്ലെന്ന് റിപ്പോർട്ട്. ഉദ്യോഗസ്ഥ ഭരണപരിഷ്‌കാര വകുപ്പിന്റെ  റിപ്പോർട്ടിലാണ് ഇക്കാര്യം ചൂണ്ടിക്കാട്ടിയിരിക്കുന്നത്. സച്ചാർ, പാലൊളി കമ്മിറ്റി റിപ്പോർട്ടുകളെ തുടർന്ന് 2011 ജനുവരി ഒന്നിനാണ് സംസ്ഥാന ന്യൂനപക്ഷ വകുപ്പ് നിലവിൽ വന്നത്. 
സെക്രട്ടേറിയറ്റിലെ ഓഫിസിന് പുറമെ 24 പരിശീലന കേന്ദ്രങ്ങളും 32 ഉപകേന്ദ്രങ്ങളുമുള്ള വകുപ്പിൽ ഐ.എ.എസ് റാങ്കിലുള്ള ഡയരക്ടർക്ക് പുറമെ അഞ്ചുപേരാണ് സ്ഥിരം ജീവനക്കാരായുള്ളത്. ബാക്കിയെല്ലാവരും കരാർ അടിസ്ഥാനത്തിലാണ് സേവനം ചെയ്യുന്നത്.

ഡയരക്ടരേറ്റിൽ പുതുതായി തസ്തികകൾ അനുവദിക്കണമെന്നും 24 പരിശീലന കേന്ദ്രങ്ങളിലെ പ്രിൻസിപ്പൽ തസ്തികയ്ക്ക് കരാർ വ്യവസ്ഥ തുടരണോ എന്ന് സർക്കാർ പരിശോധിക്കണമെന്നും റിപ്പോർട്ടിൽ ശുപാർശ ചെയ്യുന്നുണ്ട്. പോളിടെക്‌നിക്ക് വിദ്യാർഥികൾക്ക് മുതൽ വിദേശപഠനം നടത്തുന്നവർക്ക്  വരെ നിരവധി സ്‌കോളർഷിപ്പുകൾ ഈ വകുപ്പിന് കീഴിലുണ്ടെങ്കിലും 2023ൽ ആകെ വിതരണം ചെയ്തത് 6.26 കോടി രൂപയാണ്. 2022ൽ 11.59 കോടി രൂപ വിതരണം ചെയ്തിരുന്നിടത്താണിത്. മുൻ വർഷത്തേതിന്റെ പകുതിയാണ് 2023ൽ വിതരണം ചെയ്തത്. 2024ൽ വീണ്ടും തുക വെട്ടിക്കുറച്ചിട്ടുണ്ട്. 

വിദ്യാഭ്യാസ,ഉദ്യോഗ മേഖലകളിൽ ന്യൂനപക്ഷങ്ങളുടെ പങ്കാളിത്തം മെച്ചപ്പെടുത്തുക എന്ന ഉദ്ദേശ്യത്തോടെ ആരംഭിച്ച പരിശീലന കേന്ദ്രങ്ങൾ ഫലവത്തല്ലെന്ന്  റിപ്പോർട്ടിൽ പറയുന്നു. പരിശീലന കേന്ദ്രങ്ങൾ വഴി  വളരെക്കുറച്ചു പേർക്കേ ലക്ഷ്യത്തിലെത്താൻ കഴിഞ്ഞിട്ടുള്ളൂ. പല പരിശീലന കേന്ദ്രങ്ങളും ഉദ്യോഗാർഥികളുടെ കുറവു മൂലം അടച്ചുപൂട്ടലിന്റെ വക്കത്താണ്. ഉദ്യോഗാർഥികൾക്ക് ഉപകാരപ്രദമാകാത്ത നിലയിൽ പല പദ്ധതികളും  നടപ്പാക്കുന്നതിന്റെ ഉദാഹരണമാണ് 2024-25 വർഷത്തെ യു.ജി.സി. കോച്ചിങ്. ജനുവരി ഒന്നിന് ആരംഭിക്കുന്ന പരീക്ഷക്കുള്ള കോച്ചിങ് കേന്ദ്രങ്ങൾ തീരുമാനിക്കുന്നത് ഡിസംമ്പർ 17നാണ്.

18 മുതൽ 25വരെ പരിശീലനത്തിന് അപേക്ഷിക്കാനുള്ള തീയതിയും. 12 ദിവസത്തെ 72 മണിക്കൂർ പരിശീലനമാണ് നടത്തേണ്ടത്.  അപേക്ഷകരെയും പരിശീലകരെയും ഈ ചുരുങ്ങിയ ദിവസത്തിനുള്ളിൽ കണ്ടെത്തി എങ്ങനെ പരിശീലനം നടത്തുമെന്ന ചോദ്യത്തിനും ഉത്തരമില്ല.  പരിശീലന കേന്ദ്രങ്ങളുടെ പ്രവർത്തനം ഫിഷറീസ് വകുപ്പിന്റെ വിദ്യാകിരണം മാതൃകയിൽ പുനഃസംഘടിപ്പിക്കണമെന്ന് ഭരണപരിഷ്കാര വകുപ്പ് നിർദേശിക്കുന്നുണ്ട്. ആറു മാസത്തെ കോഴ്‌സുകളാണ് ഉദ്യോഗാർഥികൾക്ക് വേണ്ടി ഇപ്പോൾ  സംഘടിപ്പിക്കുന്നത്. ഇതിൽ ആവശ്യത്തിന് ഉദ്യോഗാർഥികളില്ല. ചേർന്ന് മൂന്ന് മാസം കഴിയുമ്പോഴേക്ക് ഒരു വിഭാഗം കൊഴിഞ്ഞു പോകുന്ന സ്ഥിതിയാണ്.

പരിശീലനത്തെ അടിസ്ഥാന കോഴ്‌സ് ആക്കി ഇതിൽ നിന്ന് 10-20 ശതമാനം പേരെ തെരഞ്ഞെടുക്കുകയും സ്വകാര്യ പരിശീലന കേന്ദ്രങ്ങളിലയക്കുകയും ചെയ്യുകയെന്നാണ് നിർദേശം. ഇവിടുത്തെ ഫീസിൽ ഒരു ഭാഗം സ്റ്റൈപന്റായി നൽകാവുന്നതാണ്. ജില്ലാതല പരിശീലന കേന്ദ്രങ്ങളുടെ തലവൻമാരായ പ്രിൻസിപ്പൽമാർ ഇപ്പോൾ വകുപ്പിന്റെ ജില്ലാതല ഓഫിസർമാരായാണ് പ്രവർത്തിക്കുന്നത്. 
ഏറെ ഉത്തരവാദിത്വവും സാമ്പത്തിക വിനിമയ ചുമതലയുമുള്ള ഈ തസ്തിക സ്ഥിരം ആക്കുന്നത് പരിഗണിക്കണമെന്നും റിപ്പോർട്ടിൽ പറയുന്നു. പ്ലസ് ടു, പത്താംതരം കഴിഞ്ഞവർക്ക് മാർഗനിർദേശം നൽകുന്ന പാസ് വേർഡ് എന്ന പദ്ധതിയും ഇപ്പോൾ പാതിവഴിയിലാണ്. മൂന്നു ഘട്ടമുണ്ടായിരുന്ന പദ്ധതി ആദ്യ രണ്ടുഘട്ടത്തിൽ അവസാനിക്കുന്ന സ്ഥിതിയാണ് നിലവിൽ.