കോഴിക്കോട്: ചേവായൂര്‍ സഹകരണ ബാങ്ക് തെരഞ്ഞെടുപ്പ് നടക്കുന്നതിനിടെ മൂന്നു വാഹനങ്ങള്‍ക്കു നേരെ കല്ലേറ്. വോട്ടര്‍മാരുമായി എത്തിയ വാഹനങ്ങള്‍ക്കു നേരെയാണ് കല്ലേറ് നടത്തിയത്. വാഹനങ്ങളുടെ ചില്ലുകള്‍ തകര്‍ന്നു. പൊതുതിരഞ്ഞെടുപ്പ് പോലെ വീറുംവാശിയുമാണ് ചേവായൂര്‍ സഹകരണ ബാങ്ക് ഭരണസമിതിയുടെ തെരഞ്ഞെടുപ്പിലും നടക്കുന്നത്. കോണ്‍ഗ്രസ് പാനലും സിപിഎം പിന്തുണയുള്ള കോണ്‍ഗ്രസ് വിമതരും തമ്മിലാണ് മത്സരം.

പതിറ്റാണ്ടുകളായി കോണ്‍ഗ്രസ് ഭരിക്കുന്ന ബാങ്കാണിത്. എന്നാല്‍, കുറച്ചുകാലമായി മുമ്പ് ഭരണസമിതിയിലുണ്ടായിരുന്ന ഒരു വിഭാഗം കോണ്‍ഗ്രസുമായിതന്നെ തെറ്റി കുറച്ചുകാലമായി സ്വന്തമായാണ് പ്രവര്‍ത്തിച്ചിരുന്നത്. ഇവരെ അച്ചടക്ക നടപടി സ്വീകരിച്ച് പുറത്താക്കിയിരുന്നു. പിന്നീട് ഇവരെ പിന്തുണച്ച് സിപിഎം എത്തുകയായിരുന്നു. ഇതോടെ ഇത്തവണത്തെ തെരഞ്ഞെടുപ്പിനു വാശിയേറി.

1800 ഓളം പേരെയെങ്കിലും അനധികൃതമായി പുതുതായി ചേര്‍ത്തിയെന്നാണ് ആരോപണം. ഇതിനെതിരേ കോണ്‍ഗ്രസ്‌ഹൈകോടതിയിയെ സമീപിച്ചിരുന്നു. തുടര്‍ന്ന് തര്‍ക്കമുന്നയിച്ച 1800 ഓളം വോട്ടുകള്‍ പ്രത്യേകം പെട്ടിയിലാക്കാനാണ് കോടതിയുടെ നിര്‍ദേശം. രാവിലെ എട്ടുമണിയോടെ വോട്ടെടുപ്പ് ആരംഭിച്ചു.