ശ്രീനഗര്‍: അധികാരത്തിലെത്തിയാല്‍ കശ്മീരിന്റെ പ്രത്യേക പദവി തിരികെ കൊണ്ടുവരുമെന്ന് പിഡിപി നേതാവും മുന്‍ മുഖ്യമന്ത്രി മെഹബൂബ മുഫ്തിയുടെ മകളുമായ ഇല്‍തിജ മുഫ്തി.  യുവാക്കള്‍ ഉള്‍പ്പെടെ അരക്ഷിതാവസ്ഥയിലാണെന്ന് പറഞ്ഞ അവര്‍ യുവാക്കളെ ജയിലിലടയ്ക്കലും വികസനമില്ലായ്മയുമാണ് ബിജെപിയുടെ 'നയാ കശ്മീര്‍' എന്നും പരിഹസിച്ചു. കശ്മീരില്‍ ഒരു വികസനവും ഉണ്ടായിട്ടില്ല. തടങ്കലില്‍വെക്കലും ജയിലിലടക്കലുമാണ് കശ്മീരില്‍ നടക്കുന്നതെന്നും അവര്‍ കൂട്ടിച്ചേര്‍ത്തു. 

അധികാരത്തിലെത്തിയാല്‍ കശ്മീരിന്റെ പ്രത്യേക പദവി തിരികെ കൊണ്ടുവരും. നാഷണല്‍ കോണ്‍ഫറന്‍സ്-കോണ്‍ഗ്രസ് സഖ്യം കടലാസില്‍ മാത്രമാണ്. വിജയിക്കാന്‍ വേണ്ടിയാണ് താന്‍ പോരാടുന്നതെന്നും ഇല്‍തിജ പറഞ്ഞു.ജനങ്ങളുടെ പ്രതികരണം അവിശ്വസനീയമാണ്. മെഹ്ബൂബ മുഫ്തിയുടെ മകള്‍ എന്ന നിലയിലല്ല ജനങ്ങളുമായി നേരിട്ട് ബന്ധമുണ്ടാക്കാനാണ് താന്‍ ശ്രമിക്കുന്നതെന്നും അവര്‍ പറഞ്ഞു. ബിച്ച്ബെഹ്റ മണ്ഡലത്തിലെ പിഡിപി സ്ഥാനാര്‍ഥിയാണ് ഇല്‍തിജ.