കോഴിക്കോട്: നിയമലംഘനത്തിന് പിഴ ഈടാക്കാൻ ഇറങ്ങണമെന്ന് ഗ്രേഡ് എസ്.ഐമാർക്ക് നിർദേശം. റോഡിൽ വാഹനം തടഞ്ഞ് പരിശോധന നടേത്തണ്ടെന്ന ആഭ്യന്തര വകുപ്പിന്റെയും ഡി.ജി.പിയുടെയും നിർദേശം മറികടന്നാണ് ഗ്രേഡ് എസ്.ഐമാർക്ക് ചുമതല നൽകിയത്. ഗ്രേഡ് എസ്.ഐമാരെ കൂടി നിരത്തിലിറക്കി പരമാവധി പിഴ ഈടാക്കുകയെന്ന ലക്ഷ്യമാണ് ഇതിനു പിന്നിലെന്ന് സേനയിയിൽ തന്നെ അഭിപ്രായം ഉയർന്നിട്ടുണ്ട്. പിഴ ഇടാക്കാനായി ഇ-പി.ഒ.എസ് മെഷിൻ ഉപയോഗിക്കുന്നതിനുള്ള ഐ.ഡിയും പാസ്‌വേർഡും ഇവർക്ക് അനുവദിക്കുകയും ചെയ്തു.

 നിയമലംഘനം ഗ്രേഡ് എസ്.ഐമാരുടെ ശ്രദ്ധയിൽപ്പെട്ടാൽ വാഹനത്തിന്റെ നമ്പറും ഓടിച്ചയാളുടെ മേൽവിലാസവും സഹിതം എസ്.ഐമാരെ അറിയിക്കുകയും അവർ പിഴ ചുമത്തുകയുമാണ് ചെയ്യുന്നത്. അതേസമയം, കഴിഞ്ഞ ഏതാനും ദിവസമായി ഇ-പി.ഒ.എസ് മെഷിൻ വഴി പിഴ ചുമത്താനുള്ള നിർദേശമാണ് കോഴിക്കോട് സിറ്റിയിലെ ഗ്രേഡ് എസ്.ഐമാർക്ക് നൽകിയത്. പ്രത്യേക സർക്കുലറായി ഇക്കാര്യം അറിയിക്കാതെ വാക്കാൽ നിർദേശം നൽകുകയായിരുന്നു. അതിനാൽ ഗ്രേഡ് എസ്.ഐമാർ തങ്ങൾ ബലിയാടാകുമെന്ന ആശങ്കയിലാണ്.

മോട്ടോർ വാഹന നിയമപ്രകാരം കുറ്റകൃത്യങ്ങൾ കണ്ടെത്തുന്നതിന് ഗ്രേഡ് എസ്.ഐമാരെ ചുമതലപ്പെടുത്തണമെന്ന് മുൻ ഡി.ജി.പി ലോക്‌നാഥ് ബഹ്‌റ സർക്കാരിന് കത്ത് നൽകിയിരുന്നു. ഇതിനുള്ള മുറപടിയിലാണ് ആഭ്യന്തര വകുപ്പ് ഗ്രേഡ് എസ്.ഐമാരുടെ അധികാരം സംബന്ധിച്ച് വ്യക്തമാക്കിയത്.