മാനന്തവാടി: നോര്‍ത്ത് വയനാട് ഡിവിഷനു കീഴില്‍ ജോലി ചെയ്യുന്ന താല്‍ക്കാലിക വാച്ചര്‍മാരെ പിരിച്ചുവിടാന്‍ ഡി.എഫ്.ഒ നടത്തുന്ന നീക്കം ഉപേക്ഷിക്കണമെന്ന് എ.ഐ.ടി.യു.സി കേരള സ്റ്റേറ്റ് ഫോറസ്റ്റ് വര്‍ക്കേഴ്‌സ് യൂനിയന്‍ മാനന്തവാടി താലൂക്ക് കമ്മിറ്റി ആവശ്യപ്പെട്ടു. പിരിച്ചുവിടുന്നതിന്റെ ഭാഗമായി ബേഗൂര്‍ റെയ്ഞ്ച് ഓഫിസര്‍ക്ക് ഡി.എഫ്.ഒ നോട്ടിസ് നല്‍കിയിരിക്കുകയാണ്.
രാവും പകലുമില്ലാതെ ജോലി ചെയ്യിപ്പിച്ച് മതിയായ ശമ്പളം പോലും നല്‍കാതെയാണ് നോര്‍ത്ത് വയനാട് ഡി.എഫ്.ഒ പിരിച്ചുവിടല്‍ നോട്ടീസ് നല്‍കിയിട്ടുള്ളത്. നാള്‍ക്കുനാള്‍ വന്യമൃഗശല്യം രൂക്ഷമായ സാഹചര്യത്തിലും വേനല്‍ക്കാലമായ സമയത്ത് വാച്ചര്‍മാരെ പിരിച്ചുവിടുന്ന നടപടി ന്യായീകരിക്കാന്‍ കഴിയില്ല.
ജനകീയ വിഷയങ്ങള്‍ മനസിലാക്കാതെ ഏകപക്ഷീയമായി തീരുമാനമെടുക്കുന്ന നോര്‍ത്ത് വയനാട് ഡി.എഫ്.ഒയുടെ നീക്കത്തെ ചെറുക്കുമെന്നും കമ്മിറ്റി മുന്നറിയിപ്പ് നല്‍കി. യോഗത്തില്‍ എം.ആര്‍ ചന്ദ്രന്‍ അധ്യക്ഷനായി. കെ. സജീവന്‍, ഇ. ബാലകൃഷ്ണന്‍, അഭിലാഷ് മക്കിയാട്, പ്രശാന്ത് കുഞ്ഞോം, നൗഷാദ്, ജോര്‍ജ് പുല്‍പ്പള്ളി സംസാരിച്ചു.