ജറൂസലം: അന്താരാഷ്ട്ര പ്രതിഷേധം വകവയ്ക്കാതെ അധിനിവിഷ്ട വെസ്റ്റ് ബാങ്കില്‍ 2,000 പുതിയ പാര്‍പ്പിടകേന്ദ്രങ്ങള്‍ നിര്‍മിക്കാന്‍ ഇസ്‌റാഈല്‍ സര്‍ക്കാര്‍ ഒരുങ്ങുന്നു. ഈ ആഴ്ച തന്നെ ഇതിന്റെ പ്രവൃത്തി തുടങ്ങുമെന്നാണ് റിപ്പോര്‍ട്ട്. ഇതിന് പ്രതിരോധമന്ത്രാലയം പച്ചക്കൊടി കാട്ടിക്കഴിഞ്ഞു.
ഇസ്‌റാഈലി സിവില്‍ അഡ്മിനിസ്‌ട്രേഷന്റെ ഉന്നതതല ഉപസമിതി 2,061 വീടുകള്‍ നിര്‍മിക്കുന്നതിനുള്ള പദ്ധതി പട്ടിക പ്രസിദ്ധീകരിച്ചിട്ടുണ്ട്. ഇതില്‍ 786 വീടുകളാണ് ആദ്യ ഘട്ടം നിര്‍മിക്കുക. ഇതിന് നിര്‍മാണാനുമതി ലഭിച്ചുകഴിഞ്ഞു. ശേഷിക്കുന്ന 1,275 എണ്ണം നടപടിക്രമങ്ങള്‍ പൂര്‍ത്തിയാക്കിയ ശേഷം നിര്‍മിക്കാനാണ് പദ്ധതി. ലിക്കുഡ് പാര്‍ട്ടി നേതൃസ്ഥാനത്തേക്കുള്ള തെരഞ്ഞെടുപ്പ് പ്രചാരണത്തിനിടെ പ്രധാനമന്ത്രി നെതന്യാഹു 3,000 പാര്‍പ്പിടങ്ങള്‍ നിര്‍മിക്കുമെന്ന് പറഞ്ഞിരുന്നു.
പദ്ധതി പ്രകാരം 258 വീടുകള്‍ മധ്യ വെസ്റ്റ്ബാങ്കിലെ ഹരേഷ ഔട്ട്‌പോസ്റ്റില്‍ നിര്‍മിക്കും. അതേസമയം ഹരേഷയിലേക്കുള്ള റോഡ് സ്വകാര്യ ഫലസ്തീന്‍ ഭൂമിയിലാണ്.
ഇതു കാരണം നിയമവിരുദ്ധ ഔട്ട്‌പോസ്റ്റുകള്‍ അംഗീകൃത പാര്‍പ്പിട കേന്ദ്രങ്ങളാക്കാന്‍ രണ്ടു ദശാബ്ദമായി ഇസ്‌റാഈലി സര്‍ക്കാരുകള്‍ക്ക് കഴിഞ്ഞിരുന്നില്ല.
എന്നാല്‍ ഇവിടെയുള്ള പാര്‍പ്പിടകേന്ദ്രത്തിലേക്ക് എത്തിച്ചേരാന്‍ ടണല്‍ നിര്‍മിക്കുമെന്ന് നീതിന്യായ മന്ത്രാലയം 2018ല്‍ പ്രഖ്യാപിച്ചിരുന്നു.
ഇതിനു പുറമെ ജോര്‍ദാന്‍ താഴ്‌വരയിലെ മിസ്‌പെ ജെറീക്കോയില്‍ 147 വീടുകളും മധ്യ വെസ്റ്റ്ബാങ്കിലെ ഷുവറ്റ് റാച്ചെലില്‍ 534 വീടുകള്‍ പണിയാനും ഇസ്‌റാഈലിന് പദ്ധതിയുണ്ട്.
അതേസമയം അംഗീകാരമില്ലാതെ വെസ്റ്റ്ബാങ്കില്‍ കൂടുതല്‍ പാര്‍പ്പിട കേന്ദ്രങ്ങള്‍ പണിയുന്നത് ഫലസ്തീനികളുമായി ഒരു രാഷ്ട്രീയ കരാറിലെത്തുന്നതിന് തടസ്സമാണെന്ന് ഇടതുപക്ഷ സംഘടനകള്‍ മുന്നറിയിപ്പു നല്‍കുന്നു. അടുത്തതായി ഭരണത്തില്‍ വരുന്ന സര്‍ക്കാര്‍ പുതിയ നിര്‍മാണപ്രവൃത്തികള്‍ മരവിപ്പിക്കണമെന്നും അവര്‍ ആവശ്യപ്പെടുന്നു.