പാലക്കാട്: രേഖകള്‍ സൂക്ഷിക്കുന്ന മുറിയിലെ ഫയലുകള്‍ എലിയും പാറ്റയും ചിതലും കയറി നശിച്ചതിനാല്‍ വിവരാവകാശപ്രകാരം ആവശ്യപ്പെട്ട രേഖകള്‍ നല്‍കാനാവില്ലെന്ന് ഗ്രാമപഞ്ചായത്ത് സെക്രട്ടറിയുടെ മറുപടി. ഒറ്റപ്പാലത്തിനടുത്ത് അമ്പലപ്പാറ ഗ്രാമ പഞ്ചായത്തില്‍ ബിനില്‍ കെ ജോണ്‍ എന്നയാളുടെ ഉടമസ്ഥതയില്‍ പ്രവര്‍ത്തിക്കുന്ന വള്ളുവനാട് ഗ്രാനൈറ്റസ് എന്ന കരിങ്കല്‍ ക്വാറിയുടെ വിവരങ്ങളും രേഖകളും ആവശ്യപ്പെട്ട് ഒറ്റപ്പാലം പരിസ്ഥിത സംരക്ഷണ സമിതി പ്രസിഡന്റ് സെയ്തലവി നല്‍കിയ അപേക്ഷയക്ക് മറുപടിയായാണ് രേഖകളെല്ലാം എലിയും പാറ്റയും തിന്നു പോയതായി സെക്രട്ടറി മറുപടി നല്‍കിയത്.
കഴിഞ്ഞ ഭരണ സമിതിയുടെ കാലത്താണ് വള്ളുവനാട് ഗ്രാനൈറ്റസിന് ലൈസന്‍സ് അനുവദിച്ചതെന്നും മൂന്ന് വര്‍ഷത്തിനകം തന്നെ രേഖകള്‍ തന്നെ എലി തിന്നു നശിപ്പിച്ചതുമായാണ് കഴിഞ്ഞ ദിവസം കിട്ടിയ മറുപടി.
ഇതെ ക്വാറിയുടേയും ക്രഷറിന്റേയും വിവരങ്ങള്‍ക്ക് മാസങ്ങള്‍ക്ക് മുമ്പ് പാലക്കാട് കലകട്രേറ്റില്‍ വിവരാവാകാശപ്രകാരം ആവശ്യപ്പെട്ടപ്പോഴും സമാനമായ മറുപടിയാണ് കിട്ടിയത്. രേഖകള്‍ സൂക്ഷിക്കുന്ന മുറിയില്‍ ഈ ക്വാറിയുടെ വിവരങ്ങള്‍ കണ്ടെത്താനായിട്ടില്ലെന്നും അതിനാല്‍ വിവരങ്ങള്‍ നല്‍കാന്‍ കഴിയില്ലെന്നുമാണ് പാലക്കാട് ഡെപ്യൂട്ടി കളക്ടറും മറുപടി നല്‍കിയത്. വില്ലേജിലും പഞ്ചായത്തിലും കലക്‌ട്രേറ്റിലും യാതൊരു രേഖകളും ഇല്ലാതെയാണ് അമ്പലപ്പാറയിലെ ക്രഷര്‍ പ്രവര്‍ത്തിക്കുന്നതെന്നറിഞ്ഞിട്ടും ഇതിനെതിരെ നടപടിയെടുക്കുന്നില്ലെന്ന ആരോപണമുണ്ട്.
ലക്കിടി പേരൂര്‍ പഞ്ചായത്തിലും വള്ളുവനാട് ഗ്രാനൈറ്റസ് എന്ന പേരില്‍ ഇതെ വ്യക്തിയുടെ ഉടമസ്ഥതയില്‍ ക്വാറിയും ക്രഷറും പ്രവര്‍ത്തിക്കുന്നുണ്ട്. കേന്ദ്ര വനം പരിസ്ഥിതി മന്ത്രാലയത്തിന്റെ അനുമതി ഇല്ലാതെ 20 വര്‍ഷത്തിലേറെയായി ഈ ക്വാറി പ്രവര്‍ത്തിച്ചു വരുന്നതായി പരാതിയുണ്ട്. ഒരു സ്ഥലത്ത് ക്വാറിക്ക് പരമാവധി പ്രവര്‍ത്തിക്കാനുള്ള അനുമതി 5 വര്‍ഷമാണെന്നിരിക്കെയാണ് 20 വര്‍ഷത്തിലേറെയായി ക്വാറിയും ക്രഷറും പ്രവര്‍ത്തിക്കുന്നതെന്നാണ് പരാതി. 1998 ല്‍ ക്വാറി പ്രവര്‍ത്തനം തുടങ്ങിയ സ്ഥലത്ത് നിന്ന് ഏറെ ദൂരം മാറി ഒരു വലിയ മലയെ തന്നെ ഇല്ലാതാക്കിയാണ് ലക്കിടിയില്‍ ക്വാറി പ്രവര്‍ത്തിക്കുന്നതെന്നാണ് പരാതിക്കാരുടെ വാദം.