കീഴടങ്ങാന്‍ അഞ്ച് ഉപാധികള്‍

കാളികാവ്: സംസ്ഥാനത്ത് മാവോയിസ്റ്റ് പുനരധിവാസ പദ്ധതിയിലെ ഭേദഗതിക്ക് സര്‍ക്കാരിന്റെ അംഗീകാരം. 2018 ല്‍ തയാറാക്കിയ പദ്ധതിക്ക് മാവോയിസ്റ്റുകളുടെ ഭാഗത്തുനിന്ന് ഒരു പ്രതികരണവും ലഭിക്കാത്തതിനെ തുടര്‍ന്നാണ് ഇതില്‍ കാതലായ മാറ്റം വരുത്താന്‍ സര്‍ക്കാര്‍ മുന്നോട്ട് വന്നിട്ടുള്ളത്. സംസ്ഥാന പൊലിസ് മേധാവി തയാറാക്കിയ ഭേദഗതി നിര്‍ദേശങ്ങളില്‍ മുഖ്യമന്ത്രി ഒപ്പ് വച്ചിട്ടുണ്ട്. സര്‍ക്കാര്‍ ഉത്തരവായി പുറത്തിറങ്ങുന്നതോടെ പദ്ധതി നിലവില്‍ വരും. കീഴടങ്ങുന്നവരുടെ തുടര്‍ ജീവിതം നിരീക്ഷിച്ച ശേഷം തൊഴില്‍ സംരംഭങ്ങള്‍ക്ക് അഞ്ച് ലക്ഷം രൂപ വരെ ധനസഹായം നല്‍കാന്‍ ഭേദഗതിയില്‍ നിര്‍ദേശിച്ചിട്ടുണ്ട്. കീഴടങ്ങാന്‍ അഞ്ച് ഉപാധികള്‍ നിര്‍ദേശിച്ചിട്ടുണ്ട്.
ജില്ലാ തലത്തില്‍ രൂപവല്‍ക്കരിക്കുന്ന സമിതിക്ക് മുന്‍പിലാണ് മാവോയിസ്റ്റുകള്‍ ആയുധം വച്ച് കീഴടങ്ങേണ്ടത്. കീഴടങ്ങുന്നവര്‍ കുറ്റകൃത്യങ്ങള്‍ സമിതിക്ക് മുന്നില്‍ തുറന്ന് സമ്മതിക്കണം. കൈവശമുള്ള പണത്തിന്റെ സ്രോതസും സൈന്യത്തില്‍ നിന്ന് ഉള്‍പ്പെടെ കൈവശപ്പെടുത്തിയ ആയുധങ്ങളുടെ കണക്കും വെളിപ്പെടുത്തണം. കീഴടങ്ങുന്നത് സ്വമേധയ ആണെന്ന് മാവോയിസ്റ്റുകള്‍ മാധ്യമങ്ങളില്‍ പരസ്യ പ്രസ്താവന നടത്തണം. കൊടും കുറ്റകൃത്യങ്ങള്‍ ചെയ്തവര്‍ നിയമ നടപടിക്ക് വിധേയരാവേണ്ടിവരും.എന്നിവയാണ് സര്‍ക്കാര്‍ മുന്നോട്ടുവച്ച ഉപാധികള്‍.
എന്നാല്‍ കുറ്റകൃത്യങ്ങളുടെ ഗൗരവം അനുസരിച്ച് വിചാരണ വേണ്ടതാണോ എന്ന കാര്യത്തില്‍ സര്‍ക്കാര്‍ തീരുമാനിക്കും. കോടതി കേസ് പരിഗണിക്കുമ്പോഴാണ് സര്‍ക്കാരിന്റെ ഇടപെടലുണ്ടാവുക. കോടതിയുടെ അനുമതി തേടി മാപ്പുസാക്ഷിയാക്കാനുള്ള സാഹചര്യമുണ്ടെങ്കില്‍ നടപടിയെടുക്കുമെന്നും പുനരധിവാസ പദ്ധതി രേഖയില്‍ പറയുന്നുണ്ട്.
മാവോയിസ്റ്റുകളെ മുഖ്യധാരാ ജീവിതത്തിലേക്ക് തിരിച്ച് കൊണ്ടുവരിക എന്ന ലക്ഷ്യത്തോടെയാണ് പദ്ധതി തയാറാക്കിയിട്ടുള്ളത്. കേന്ദ്ര സര്‍ക്കാര്‍ നിര്‍ദേശത്തെ തുടര്‍ന്നാണ് സംസ്ഥാന പൊലിസ് മേധാവി പുനരധിവാസ പദ്ധതി സംസ്ഥാന സര്‍ക്കാരിന് സമര്‍പ്പിച്ചിട്ടുള്ളത്.