തളിപ്പറമ്പ്: സംസ്ഥാന സര്‍ക്കാര്‍ ജീവനക്കാര്‍ക്കും അധ്യാപകര്‍ക്കും ലഭിക്കേണ്ടിയിരുന്ന ശമ്പള പരിഷ്‌കരണ കുടിശ്ശികയുടെ പലിശ വെട്ടിച്ചുരുക്കി സര്‍ക്കാര്‍ ഉത്തരവായി. ഈ മാസം 22ന് ഇറക്കിയ ഉത്തരവിലൂടെ ജീവനക്കാര്‍ക്ക് ലഭിക്കേണ്ടിയിരുന്ന 8.7 ശതമാനം പലിശ എട്ടു ശതമാനമായി കുറച്ചിരിക്കുകയാണ്.
കഴിഞ്ഞ യു.ഡി.എഫ് സര്‍ക്കാരിന്റെ കാലത്താണ് സംസ്ഥാന സര്‍ക്കാര്‍ ജീവനക്കാരുടെയും അധ്യാപകരുടെയും ശമ്പളംപരിഷ്‌കരിച്ച് ഉത്തരവായത്. 2016 ജനുവരി 20 ന് ഇറക്കിയ ഉത്തരവിന് 2014 ജനുവരി ഏഴുമുതല്‍ മുന്‍കാല പ്രാബല്യവും അനുവദിച്ചിരുന്നു.
കുടിശ്ശിക നാലു തുല്യ ഗഡുക്കളായി വിതരണം ചെയ്യുമെന്നും ഉത്തരവില്‍ വ്യക്തമാക്കിയിരുന്നു. ഇതനുസരിച്ച് 2016 മെയ് 19 ന് ഇറക്കിയ ധനകാര്യ വകുപ്പിന്റെ 462016 നമ്പര്‍ സര്‍ക്കുലര്‍ പ്രകാരം 2017 ഏപ്രില്‍ ഒന്ന്, ഒക്ടോബര്‍ ഒന്ന്, 2018 മാര്‍ച്ച് ഒന്ന്, ഒക്ടോബര്‍ ഒന്ന് എന്നീ തിയതികളില്‍ നാലു തുല്യ ഗഡുക്കളായി കുടിശ്ശിക 8.7 ശതമാനം പലിശയോടെ പണമായി നല്‍കുന്നതിനുള്ള നടപടികള്‍ സ്വീകരിക്കാന്‍ ധനകാര്യ വകുപ്പ് ഓഫിസ് മേധാവികള്‍ക്ക് നിര്‍ദേശം നല്‍കിയിരുന്നു.
എന്നാല്‍ കുടിശ്ശികയുടെ ആദ്യഗഡു ലഭിക്കാന്‍ ദിവസങ്ങള്‍ മാത്രം ബാക്കി നില്‍ക്കെ മാര്‍ച്ച് 22 ന് പുറപ്പെടുവിച്ച 402017 നമ്പര്‍ ഉത്തരവിലൂടെ ധനകാര്യ വകുപ്പ് പലിശ 8 ശതമാനമായി കുറച്ചിരിക്കുകയാണ്.
സര്‍ക്കാര്‍ ജീവനക്കാര്‍ക്ക് ന്യായമായും ലഭിക്കേണ്ടിയിരുന്ന ആനുകൂല്യം വെട്ടിക്കുറച്ചതിനെതിരേ ജീവനക്കാര്‍ക്കിടയില്‍ പ്രതിഷേധമുയരുന്നുണ്ട്.