2026 ഫിഫ ലോകകപ്പിൽ പോർച്ചുഗലിനായി ക്രിസ്റ്റ്യാനോ റൊണാൾഡോ കളിക്കുമോയെന്നാണ് ഫുട്ബോൾ ലോകം ഉറ്റുനോക്കുന്നത്. ഇപ്പോൾ ഈ വിഷയത്തിൽ തന്റെ അഭിപ്രായം പറയുകയാണ് മുൻ ഫ്രഞ്ച് താരം ഇമ്മാനുവൽ പെറ്റിറ്റ്. റൊണാൾഡോയെ ടീമിൽ നിന്നും പുറത്താക്കാൻ പരിശീലകൻ റോബർട്ടോ മാർട്ടിനസിന് ധൈര്യമുണ്ടോ എന്നാണ് മുൻ ഫ്രഞ്ച് താരം ചോദ്യം ചോദിച്ചത്. ലോകകപ്പിൽ റൊണാൾഡോ പകരക്കാരനായി ഇറങ്ങുന്നതാണ് നല്ലതെന്നും മുൻ ഫ്രഞ്ച് താരം അഭിപ്രായപ്പെട്ടു. സാംബാസ്ലോട്ട്സിനോട് സംസാരിക്കുകയായിരുന്നു ഇമ്മാനുവൽ. 

''ഇത്ര പ്രായമായിട്ടും മത്സരങ്ങൾ വിജയിക്കണമെന്നാണ് റൊണാൾഡോ ആഗ്രഹിക്കുന്നത്. എല്ലാ സീസണിലും കളിക്കുന്ന ഓരോ മത്സരങ്ങളിലും ചരിത്രം സൃഷ്ടിക്കാൻ അവൻ ആഗ്രഹിക്കുന്നു. കഴിഞ്ഞ ടൂർണമെന്റിൽ പോർച്ചുഗൽ  പുറത്തായതിൽ അവൻ ദുഃഖിതനായിരിക്കും. ഇതെല്ലം ലോകകപ്പിൽ ശരിയാക്കാം എന്നായിരിക്കും അവൻ ആഗ്രഹിക്കുക. എന്നാൽ ഏറ്റവും വലിയ പ്രശ്നം എന്തെന്നാൽ പോർച്ചുഗൽ റൊണാൾഡോയെ നിലനിർത്തേണ്ടതില്ല. മത്സരത്തിൽ ആദ്യ ഇലവനിൽ റൊണാൾഡോയെ ഇറക്കുന്നതിനു പകരം ബെഞ്ചിൽ ഇരിക്കുന്നതാണ് നല്ലതെന്ന് പറയാൻ കോച്ചിന് ധൈര്യം വേണം. എല്ലാ മത്സരങ്ങളിലും റൊണാൾഡോക്ക് കളിക്കാൻ കഴിയില്ല. ഇത് ടീമിന്റെ മാനസികാവസ്ഥയെ ദോഷകരമായി ബാധിക്കും. റൊണാൾഡോ ബെഞ്ചിൽ ഇരിക്കാൻ തയാറാകുമോ? അദ്ദേഹം അങ്ങനെ ചെയ്യുമെന്ന് ഞാൻ കരുതുന്നില്ല. ശക്തമായ ഒരു മാനേജർ ഉണ്ടെങ്കിലേ ഇതെല്ലം നടക്കൂ'' ഇമ്മനുവൽ പെറ്റിറ്റ് പറഞ്ഞു. 

തന്റെ ഫുട്ബോൾ കരിയറിൽ ഒരിക്കൽപോലും നേടാനാവാത്ത ലോകകപ്പ് സ്വന്തമാക്കാനുള്ള റൊണാൾഡോയുടെ അവസാന അവസരം കൂടിയാണ് 2026 ഫിഫ ലോകകപ്പ്. 2026 ലോക കപ്പിന്റെ ഭാഗമാവാൻ റൊണാൾഡോക്ക് സാധിച്ചാൽ ആറ് ലോകകപ്പുകളിൽ കളിക്കുന്ന താരമായി മാറാനും റൊണാൾഡോക്ക് സാധിക്കും. 

സഊദി ക്ലബ് അൽ നസറിന് വേണ്ടി ഇതിഹാസതാരം ക്രിസ്റ്റ്യാനോ റൊണാൾഡോ പ്രായത്തെ പോലും വെല്ലുന്ന പോരാട്ടവീര്യമാണ് നടത്തിക്കൊണ്ടിരിക്കുന്നത്. ഓരോ മത്സരങ്ങൾ കഴിയുമ്പോഴും തന്റെ ബൂട്ടുകളിൽ നിന്നും ഗോൾ വേട്ട തുടർന്ന് കൊണ്ടിരിക്കുകയാണ് റൊണാൾഡോ. ഇതിനോടകം തന്നെ 933 ഗോളുകളാണ് സ്വന്തമാക്കിയിട്ടുള്ളത്. ൽ നസറിനായി സഊദി ലീഗിൽ ഈ സീസണിൽ 23 ഗോളുകളാണ് റൊണാൾഡോ അടിച്ചുകൂട്ടിയിരിക്കുന്നത്. നിലവിലെ ലീഗിലെ ഗോൾ വേട്ടക്കാരുടെ പട്ടികയിൽ ഒന്നാമതുള്ളതും റൊണാൾഡോ തന്നെയാണ്.

Former French player Emmanuel Petit gives his opinion on Cristiano Ronaldo playing for Portugal in the 2026 FIFA World Cup