ഹൈദരാബാദ്: ഐപിഎല്ലിൽ ഇന്ന് നടക്കുന്ന മത്സരത്തിൽ സൺറൈസേഴ്‌സ് ഹൈദെരാബാദും മുംബൈ ഇന്ത്യൻസും തമ്മിൽ ഏറ്റുമുട്ടും. ഹൈദരാബാദിന്റെ തട്ടകമായ രാജീവ് ഗാന്ധി സ്റ്റേഡിയത്തിലാണ് മത്സരം നടക്കുന്നത്. പ്ലേ ഓഫ് സാധ്യതകൾ നിലനിർത്തണമെങ്കിൽ ഇരു ടീമുകൾക്കും വിജയം അനിവാര്യമാണ്. 

നിലവിൽ എട്ട് മത്സരങ്ങളിൽ നിന്നും നാല് വീതം ജയവും തോൽവിയുമായി എട്ട് പോയിന്റുമായി ആറാം സ്ഥാനത്താണ് മുംബൈ. മറുഭാഗത്ത് ഏഴ് മത്സരങ്ങളിൽ നിന്നുമായി രണ്ട് ജയവും അഞ്ചു തോൽവിയും അടക്കം നാല് പോയിന്റോടെ ഒമ്പതാം സ്ഥാനത്താണ് പാറ്റ് കമ്മിൻസും സംഘവും. 

ഈ നിർണായക മത്സരത്തിൽ മുംബൈ സ്റ്റാർ പേസർ ജസ്പ്രീത് ബുംറയെ കാത്തിരിക്കുന്നത് ഒരു തകർപ്പൻ റെക്കോർഡാണ്. ഈ മത്സരത്തിൽ ഒരു വിക്കറ്റ് നേടാനായാൽ ടി20 ക്രിക്കറ്റിൽ 300 വിക്കറ്റെന്ന നാഴികക്കല്ല് പിന്നിടാൻ ബുംമ്രക്ക് സാധിക്കും. 

ക്രിക്കറ്റിന്റെ എല്ലാ ഫോർമാറ്റുകളിലും അസാമാന്യമായ ബൗളിംഗ് മികവിന് പേരുകേട്ടയാളാണ് ബുംറ. ടി20യിലും അദ്ദേഹം തന്റെ മികവ് തെളിയിച്ചിട്ടുണ്ട്, ഇന്നത്തെ മത്സരത്തോടെ ടി20 ക്രിക്കറ്റിൽ 300 വിക്കറ്റ് തികയ്ക്കാൻ ബുംമ്രക്ക് സാധിക്കുമോ എന്നാണ് ആരാധകർ ഉറ്റു നോക്കുന്നത്. അതേസമയം ഇന്ന് ഹൈദരാബാദിനെതിരെ രണ്ട് വിക്കറ്റുകൾ നേടാൻ ബുംമ്രക്ക് സാധിച്ചാൽ ഐപിഎല്ലിൽ മുംബൈക്ക്‌ വേണ്ടി ഏറ്റവും കൂടുതൽ വിക്കറ്റുകൾ നേടുന്ന താരമെന്ന റെക്കോർഡ് കൂടി താരത്തെ തേടിയെത്തും. 

ഇതിനോടകം തന്നെ 169 വിക്കറ്റുകളാണ് മുംബൈയ്ക്ക് വേണ്ടി ബുംറ നേടിയിട്ടുള്ളത്. 170 വിക്കറ്റുകൾ നേടിയ ശ്രീലങ്കൻ ഇതിഹാസ ബൗളർ ലസിത് മല്ലിംഗയാണ് ഈ നേട്ടത്തിൽ ഒന്നാം സ്ഥാനത്തുള്ളത്. അതുകൊണ്ടുതന്നെ രണ്ട് വിക്കറ്റുകൾ കൂടി നേടിയാൽ ലങ്കൻ ഇതിഹാസത്തെയും മറികടന്ന് മുംബൈയുടെ എക്കാലത്തെയും മികച്ച വിക്കറ്റ് വേട്ടക്കാരൻ ആവാൻ ബുംറക്ക്‌ സാധിക്കും.

പരുക്കിൽ നിന്നും മുക്തി നേടി തിരിച്ചെത്തിയ ബുംറ ഈ സീസണിൽ നാല് മത്സരങ്ങളിൽ നിന്നും നാല് വിക്കറ്റുകളാണ്‌ ബുംറ സ്വന്തമാക്കിയിട്ടുള്ളത്. ചെന്നൈ സൂപ്പർ കിങ്സിനെതിരെയുള്ള അവസാന മത്സരത്തിലും ബുംറ മികച്ച പ്രകടനമാണ് നടത്തിയത്. നാല് ഓവറിൽ വെറും 25 റൺസ് മാത്രം വിട്ടു നൽകി രണ്ട് വിക്കറ്റുകളാണ്‌ ബുംറ നേടിയത്. എംഎസ് ധോണിയുടെയും ശിവം ദുബെയുടെയും വിക്കറ്റുമാണ് ബുംറ നേടിയത്. ഈ മിന്നും പ്രകടനങ്ങൾ വരും മത്സരങ്ങളിലും ആവർത്തിക്കുമെന്നാണ് ആരാധകർ പ്രതീക്ഷിക്കുന്നത്.  

ചെന്നൈയെ ഒമ്പത് വിക്കറ്റുകൾക്കായിരുന്നു മുംബൈ ഇന്ത്യൻസ് പരാജയപ്പെടുത്തിയത്. മുംബൈയുടെ തട്ടകമായ വാംഖഡെ സ്റ്റേഡിയത്തിൽ നടന്ന മത്സരത്തിൽ ആദ്യം ബാറ്റ് ചെയ്ത ചെന്നൈ 20 ഓവറിൽ അഞ്ച് വിക്കറ്റ് നഷ്ടത്തിൽ 176 റൺസ് ആണ് നേടിയത്. വിജയലക്ഷ്യം പിന്തുടർന്നിറങ്ങിയ മുംബൈ 15.4 ഓവറിൽ ഒരു വിക്കറ്റ് നഷ്ടത്തിൽ ലക്ഷ്യം അനായാസമായി മറികടക്കുകയായിരുന്നു. 

Indian pacer Jasprit Bumrah is set to take the field in Hyderabad, and his presence is expected to make a significant impact. With a string of records within reach, Bumrah's performance will be closely watched as he looks to add to his impressive tally of achievements in cricket