ദുബൈ:  ഫ്രാൻസിസ് മാർപാപ്പയുടെ വിയോഗത്തിൽ ആസ്റ്റര്‍ ഡിഎം ഹെല്‍ത്ത് കെയർ സ്ഥാപക ചെയർമാൻ ഡോ. ആസാദ് മൂപ്പന്‍ അഗാധമായ ദുഃഖവും അനുശോചനവും രേഖപ്പെടുത്തി. കരുണയും ദീര്‍ഘവീക്ഷണവുമുള്ള ഒരു നേതാവായിരുന്നു അദ്ദേഹം. വിനയം, ഐക്യം, സമാധാനത്തോടുള്ള അചഞ്ചലമായ പ്രതിബദ്ധത എന്നിവ കൈമുതലാക്കിയ അദ്ദേഹത്തിന്റെ പാരമ്പര്യം ലോകമെമ്പാടും ആഴത്തിലുള്ള സ്വാധീനം ചെലുത്തിയിട്ടുണ്ട്. സഹിഷ്ണുതയ്ക്കും, മതങ്ങള്‍ തമ്മിലുള്ള സൗഹാര്‍ദ്ദത്തിനും ഏറെ പ്രാധാന്യം നല്‍കുന്ന രാജ്യമായ യുഎഇയിലേക്ക് 2019ല്‍ അദ്ദേഹം നടത്തിയ ചരിത്രപരമായ സന്ദര്‍ശനം, നാം വിലമതിക്കുന്ന സഹവര്‍ത്തിത്വത്തിന്റെയും പരസ്പര ബഹുമാനത്തിന്റെയും മൂല്യങ്ങളെ ശക്തിപ്പെടുത്തുന്ന നിര്‍ണായക മുഹൂര്‍ത്തമായി മാറിയിരുന്നു. സംവാദത്തിനുള്ള സന്നദ്ധത, ദുര്‍ബലരോടുള്ള ചേര്‍ന്നുനില്‍ക്കല്‍, വിവിധ വിഭാഗങ്ങള്‍ക്കിടയില്‍ വിടവുകള്‍ നികത്താനുള്ള ശ്രമങ്ങള്‍ എന്നിവ അദ്ദേഹത്തെ ഒരു പ്രിയപ്പെട്ട ആത്മീയ നേതാവ് മാത്രമല്ല, പ്രതീക്ഷയുടെയും കരുണയുടെയും മാറ്റത്തിന്റെയും ആഗോള പ്രതീകമാക്കിയും മാറ്റി. അദ്ദേഹത്തിന്റെ ഈ മഹിതമായ പാരമ്പര്യം ലോകമെമ്പാടുമുള്ള സമൂഹങ്ങളെ തുടര്‍ന്നും പ്രചോദിപ്പിക്കും -പ്രസ്താവനയിൽ കൂട്ടിച്ചേർത്തു.

Dr. Azad Moopen reflects on the loss of a compassionate and far-sighted leader, highlighting their qualities of kindness and vision.