അരിസോണില്‍ കാണാതായ രണ്ടു വയസുള്ള കുഞ്ഞിനെ 40 ഉദ്യോഗസ്ഥര്‍ 16 മണിക്കൂര്‍ തിരഞ്ഞിട്ടും കിട്ടാത്ത കുഞ്ഞിനെ രക്ഷപ്പെടുത്തിയത് വളര്‍ത്തു നായ. അനറ്റോലിയന്‍ പൈറനീസില്‍ നിന്നുള്ള ബുഫോര്‍ഡ് എന്ന വളര്‍ത്തുനായയാണ് രക്ഷകനായത്. യവാപായ് കൗണ്ടി ഷെരീഫ് ഓഫിസ് പങ്കിട്ട ഒരു വിഡിയോയിലാണ് അത്ഭുതകരമായ ഈ രക്ഷപ്പെടുത്തലിന്റെ വിവരണങ്ങള്‍ ഉള്ളത്.

നായയുടെ ഉടമ പറയുന്നതനുസരിച്ച് പതിവ് നടത്തത്തിനിടയിലാണ് ഈ നായ കാണാതായ കുട്ടിയെ കണ്ടെത്തി സുരക്ഷിത സ്ഥാനത്ത് എത്തിച്ചത്. തിങ്കളാഴ്ച വൈകുന്നേരമാണ് സെലിഗ്മാനിലെ വീട്ടില്‍ നിന്ന് രണ്ട് വയസ്സുള്ള ഒരു കുട്ടിയെ കാണാതായി എന്ന വിവരം യവാപായ് കൗണ്ടി ഷെരീഫ് ഓഫിസില്‍ റിപോര്‍ട്ട് ചെയ്യുന്നത്.

ഉടന്‍തന്നെ 40ലധികം സെര്‍ച്ച് ആന്‍ഡ് റെസ്‌ക്യൂ അംഗങ്ങള്‍ കുട്ടിയെ അന്വേഷിക്കാന്‍ തുടങ്ങി. 16 മണിക്കൂര്‍ നീണ്ട തിരച്ചിലിന് ശേഷം കുട്ടിയുടെ വീട്ടില്‍ നിന്ന് ഏഴ് മൈല്‍ അകലെ ഒരു സ്ഥലത്ത് വച്ച് ഒരു അന്വേഷണോദ്യോഗസ്ഥന്‍ ഈ കുട്ടിയെ കണ്ടെത്തി. എന്നാല്‍, യഥാര്‍ഥത്തില്‍ കുട്ടിയെ കണ്ടെത്തിയതിന് പിന്നിലെ ഹീറോ ഉദ്യോഗസ്ഥന്‍ അല്ല. ബുഫോര്‍ഡ് എന്ന നായയായിരുന്നു.

ഈ നായയുടെ ഉടമ പറയുന്നത്,  വീടിന്റെ ഗേറ്റിനോട് ചേര്‍ന്ന് എന്തോ സൂക്ഷ്മമായി നിരീക്ഷിച്ച് കൊണ്ടിരിക്കുന്ന നായയെ കണ്ട് അദ്ദേഹം പുറത്തിറങ്ങി നോക്കി എന്നാണ്. അപ്പോഴാണ് കുട്ടിയെ കണ്ടെത്തിയത്. ഉടന്‍തന്നെ അദ്ദേഹം കുഞ്ഞിനെ സുരക്ഷിതമാക്കുകയും അന്വേഷിച്ച് എത്തിയ ഉദ്യോഗസ്ഥര്‍ക്ക് കൈമാറുകയുമായിരുന്നു.

 ഒരു മരത്തിന്റെ ചുവട്ടില്‍ കിടന്നുറങ്ങിയപ്പോഴാണ് നായ തന്നെ കണ്ടതെന്ന് കുട്ടി പിന്നീട് പൊലിസ് ഉദ്യോഗസ്ഥരോട് പറഞ്ഞു. നായ തന്നെ ആക്രമിച്ചില്ലെന്നും കുട്ടി പറഞ്ഞു. കുട്ടിയെ സുരക്ഷിതമായി സംരക്ഷിച്ചതിന് ഉദ്യോഗസ്ഥര്‍ ബുഫോര്‍ഡിനും അവന്റെ ഉടമയ്ക്കും നന്ദിയും പറഞ്ഞു. സാമൂഹിക മാധ്യമങ്ങളില്‍ അഭിനന്ദനമാണ് ഇവര്‍ക്ക് ലഭിക്കുന്നത്.