റിയാദ്: സൗദി അറേബ്യക്കാരുടെ ആയുസ്സ് കൂടുന്നു. കഴിഞ്ഞ ഒമ്പത് വര്‍ഷത്തിനുള്ളില്‍ 4.8 വയസ്സ് ആണ് സഊദിക്കാര്‍ക്ക് കൂടിയത്. ആരോഗ്യ മേഖല പരിവര്‍ത്തന പദ്ധതിയുടെ സംഭാവനകള്‍ കാരണം 2016 ല്‍ 74 വര്‍ഷമായിരുന്ന സഊദി അറേബ്യയിലെ ശരാശരി ആയുര്‍ദൈര്‍ഘ്യം 2024 ല്‍ 78.8 വര്‍ഷമായി ഉയര്‍ന്നതായി ആരോഗ്യമന്ത്രാലയം അറിയിച്ചു.

ഹൈഡ്രജന്‍ എണ്ണകളും അമിത ഉപ്പും ഉള്‍പ്പെടെയുള്ള ഭക്ഷ്യ ഉല്‍പന്നങ്ങളിലെ ദോഷകരമായ ചേരുവകള്‍ കുറയ്ക്കുന്നതിനൊപ്പം പ്രമേഹം, പൊണ്ണത്തടി, കാന്‍സര്‍ തുടങ്ങിയ വിട്ടുമാറാത്ത രോഗങ്ങള്‍ക്കുള്ള തുടക്കത്തിലേ ഉള്ള പരിശോധന വര്‍ദ്ധിപ്പിക്കുന്നതുള്‍പ്പെടെയുള്ള സമഗ്ര ആരോഗ്യ നയങ്ങള്‍ നടപ്പിലാക്കിയതാണ് ഈ പുരോഗതിക്ക് നേരിട്ട് കാരണമെന്ന് അധികൃതര്‍ അറിയിച്ചു. പ്രതിരോധത്തിലും മികച്ച ചികിത്സാ സംവിധാനങ്ങള്‍ മെച്ചപ്പെടുത്തുന്നതിലും കൂടുതല്‍ ശ്രദ്ധ കേന്ദ്രീകരിക്കുന്നതും സംരംഭത്തിന്റെ ഭാഗമാണ്.

സൗദി അറേബ്യയിലെ ആരോഗ്യ പരിപാലന ഉദ്യോഗസ്ഥരെ പരിശീലിപ്പിക്കുന്നതിലൂടെയും ഡയഗ്‌നോസ്റ്റിക്, ചികിത്സാ സേവനങ്ങള്‍ നവീകരിക്കുന്നതിലൂടെയും പൗരന്മാര്‍ക്കും പ്രവാസികള്‍ക്കും വേണ്ടിയുള്ള ആരോഗ്യ സേവനങ്ങളുടെ കാര്യക്ഷമതയും ഗുണനിലവാരവും വര്‍ദ്ധിപ്പിക്കുകയും ചെയ്തിട്ടുണ്ട്. പൊതുജനാരോഗ്യ സൂചകങ്ങളും മൊത്തത്തിലുള്ള ജീവിത നിലവാരവും ഗണ്യമായി മെച്ചപ്പെടുത്താനും കഴിഞ്ഞു. 2030 ഓടെ രാജ്യത്ത് ആയുര്‍ദൈര്‍ഘ്യം 80 വര്‍ഷമായി ഉയര്‍ത്താന്‍ ലക്ഷ്യമിടുന്ന ആരോഗ്യ പരിവര്‍ത്തന സംരംഭപദ്ധതിയുമായി ഒത്തുപോകുന്നതാണ് ഈ നേട്ടമെന്നും അധികൃതര്‍ അവകാശപ്പെട്ടു.

Saudis' life expectancy increases; 4.8 years in 9 years