നിങ്ങള്‍ വീട് എത്ര വൃത്തിയാക്കിയാലും ചിലപ്പോള്‍ എവിടെയെങ്കിലും ചെറിയ ഒരു പോരായ്മ കാണാം. എന്നാല്‍ ആ പോരായ്മയിലേക്കു തന്നെയാവും എല്ലാവരുടെയും നോട്ടം ആദ്യമെത്തുന്നതും. അങ്ങനെയുള്ള ഒരു സ്ഥലമാണ് വീട്ടിലെ സ്വിച്ച് ബോര്‍ഡുകള്‍. ഈ സ്വിച്ച് ബോര്‍ഡുകള്‍ വൃത്തികേടായി ചളിയും പൊടിയും പിടിച്ചു കിടക്കുകയാണെങ്കില്‍ പറയുകയും വേണ്ട. എപ്പോഴും കൈകള്‍ കൊണ്ട് സ്വിച്് ഓണ്‍ ചെയ്യുമ്പോള്‍ കൈകളുടെ പാടുകളുമുണ്ടായിരിക്കും. അതുകൊണ്ട് തന്നെ റൂം മുഴുവന്‍ വൃത്തിയാക്കിയാല്‍ ഒരു പൂര്‍ണത കിട്ടില്ല. എന്നാല്‍ അവ മിനുസപ്പെടുത്താന്‍ വളരെ എളുപ്പമാണ്. അതും വിലകൂടിയ ക്ലീനര്‍ ഇല്ലാതെ തന്നെ വീട്ടിലെ സാധനങ്ങള്‍ ഉപയോഗിച്ചു തന്നെ വൃത്തിയാക്കി എടുക്കാവുന്നതാണ്.  

ആദ്യം തന്നെ ശ്രദ്ധിക്കേണ്ടത് സുരക്ഷയാണ്. കാരണം വൃത്തിയാക്കുന്നത് സ്വിച്ച് ബോര്‍ഡായതു കൊണ്ട്. അതുകൊണ്ട് പ്രധാനമായും പവര്‍ സ്വിച്ച് ഓഫ് ചെയ്യുക. ഉണങ്ങിയതോ ചെറിയ നനവുള്ളതോ ആയ തുണി ഉപയോഗിച്ചു മാത്രം വൃത്തിയാക്കുക. ഭിത്തിയില്‍ വെള്ളം പടരാനും അനുവദിക്കരുത്. 

ബേക്കിങ് സോഡ

കുറച്ച് ബേക്കിങ് സോഡ വെള്ളത്തില്‍ ഇട്ട് കട്ടിയില്‍ ഒരു പേസ്റ്റ് ഉണ്ടാക്കുക. 
ഈ പേസ്റ്റ് പഴയ ടൂത്ത് ബ്രഷ് അല്ലെങ്കില്‍ കോട്ടണ്‍ തുണി ഉപയോഗിച്ച് സ്വിച്ച് ബോര്‍ഡില്‍ തേയ്ച്ചിടുക. കുറച്ചു സമയം കഴിഞ്ഞു ഉണങ്ങിയ തുണി ഉപയോഗിച്ച് നന്നായി തുടച്ചെടുക്കുക. 

നാരങ്ങ

ഒരു നാരങ്ങ നടുകെ മുറിച്ച് ഒരു ഭാഗത്ത് കുറച്ച് ഉപ്പ് പുരട്ടുക. ശേഷം സ്വിച്ച്‌ബോര്‍ഡില്‍ മെല്ലെ ഉരസുക. അതിനു ശേഷം നേരിയ നനവുള്ള തുണികൊണ്ട് വൃത്തിയായി തുടച്ചെടുക്കുക. നാരങ്ങയില്‍ കറകള്‍ കളയാനുള്ള പ്രകൃതിപരമായ ആസിഡ് ഉള്ളതാണ്.

വിനാഗിരി

വെള്ളവും വിനാഗിരിയും ഒരു പാത്രത്തില്‍  തുല്യ അളവില്‍ എടുക്കുക. ഈ കൂട്ട് മൈക്രോ ഫൈബര്‍ തുണി ഉപയോഗിച്ച് സ്വിച്ച് ബോര്‍ഡില്‍ പുരട്ടുക. പെട്ടെന്നുതന്നെ അഴുക്ക് അയഞ്ഞങ്ങു പോവും. തുടര്‍ന്ന് ഉണങ്ങിയ തുണി ഉപയോഗിച്ച് തുടച്ചെടുക്കുക. 

ടൂത്ത്‌പേസ്റ്റ് 

ടൂത്ത് ബ്രഷില്‍ അല്‍പം പേസ്റ്റ് പുരട്ടി സ്വിച് ബോര്‍ഡില്‍ തേയ്ച്ചു കൊ
ടുക്കുക. എന്നിട്ട് നേരിയ നനവുള്ള തുണികൊണ്ട് തുടച്ചെടുക്കാവുന്നതാണ്. സ്വിച്ച് ബോര്‍ഡുകള്‍ വൃത്തിയാക്കുന്നതിനായി ഒരു പഞ്ഞിയില്‍ കുറച്ച് വെളിച്ചെണ്ണ മുക്കി മൃദുവായി ഒന്നു തുടച്ചെടുക്കാം. ഇത് നന്നായി വൃത്തിയായി സ്വിച്ച് ബോര്‍ഡ് തിളങ്ങാന്‍ സഹായിക്കും.