ഏപ്രിൽ 12-ന് രാത്രി 8:22ന് (GMT സമയം) വസന്തകാലത്തെ ആദ്യത്തെ പൂർണ ചന്ദ്രൻ അധവാ പിങ്ക് മൂൺ ആകാശത്ത് തെളിയും. അതേസമയം ഈ 'പിങ്ക് മൂൺ' ഒരു സൂപ്പർമൂൺ ആയിരിക്കില്ല, മറിച്ച് ഒരു മൈക്രോമൂൺ ആയിരിക്കും.

ചന്ദ്രൻ ഭൂമിയിൽ നിന്ന് ഏറ്റവും അകലെയാകുന്ന സാഹചര്യത്തിലാണ് മൈക്രോമൂൺ പ്രതിഭാസം കാണാനാകുക. സൂപ്പർമൂണിൽ നിന്ന് വ്യത്യസ്തമായി, ഈ സമയത്ത് ചന്ദ്രൻ ചെറുതും മങ്ങിയതുമായി കാണപ്പെടും. ഏപ്രിൽ 13-ന് ചന്ദ്രൻ അതിന്റെ അപ്പോജിയിൽ (ഭൂമിയിൽ നിന്ന് ഏറ്റവും അകലെയുള്ള സ്ഥാനം) എത്തുന്നതിനാൽ, ഏപ്രിൽ 12 ചന്ദ്രന്റെ ചിത്രങ്ങളെടുക്കാൻ ഏറ്റവും മികച്ച സമയമായിരിക്കും. ജ്യോതിശാസ്ത്രപ്രേമികൾക്ക് ഈ അപൂർവ ദൃശ്യം നഗ്നനേത്രങ്ങളാൽ നിരീക്ഷിക്കാനാകും.

പിങ്ക് മൂൺ എന്ന പേര് കേട്ടാൽ ചന്ദ്രൻ പിങ്ക് നിറത്തിൽ കാണപ്പെടുമെന്ന് തെറ്റിദ്ധരിക്കേണ്ട. ഈ പ്രത്യേക പേര് വടക്കേ അമേരിക്കയിൽ വസന്തകാലത്ത് പൂത്തുനിൽക്കുന്ന ഒരു പ്രത്യേക പൂവിനെ അടിസ്ഥാനമാക്കിയുള്ളതാണ്. 'ക്രീപ്പിംഗ് ഫ്ലോക്സ്' (ശാസ്ത്രീയ നാമം: ഫ്ലോക്സ് സുബുലാറ്റ) എന്ന ഈ പിങ്ക് നിറത്തിലുള്ള പൂവിൽ നിന്നാണ്  ഏപ്രിൽ മാസത്തിലെ പൂർണ ചന്ദ്രന് ഈ പേര് ലഭിച്ചത്. അമേരിക്കൻ ആദിവാസി സംസ്കാരത്തിൽ പ്രകൃതിയിലെ ഋതുമാറ്റങ്ങളെ സൂചിപ്പിക്കാൻ ചന്ദ്രന് വിവിധ പേരുകൾ നൽകുന്ന പാരമ്പര്യവും ഇതിന് പിന്നിലുണ്ട്. ഈ സമ്പ്രദായത്തിലൂടെയാണ് കാർഷിക ചക്രവും വേട്ടയാടൽ സമയങ്ങളും നിർണ്ണയിച്ചിരുന്നത്.

ഏപ്രിൽ മാസത്തിലെ ഈ പൂർണ ചന്ദ്രന് വിവിധ സംസ്കാരങ്ങൾ വിവിധ പേരുകൾ നൽകിയിട്ടുണ്ട്. ബ്രേക്കിംഗ് ഐസ് മൂൺ, മൂൺ വെൻ ദ ഗീസ് ലേ എഗ്സ്, മൂൺ വെൻ ദ ഡക്ക്സ് കം ബാക്ക്, ഫ്രോഗ് മൂൺ എന്നിവ പിങ്ക് മൂണിന്റെ മറ്റ് ചില പേരുകളാണ്. ഈ പേരുകൾ പ്രകൃതിയിലെ മാറ്റങ്ങളെയും കാലാവസ്ഥാ വ്യതിയാനങ്ങളെയും അടിസ്ഥാനമാക്കിയുള്ളതാണ്. വസന്തകാലത്തിന്റെ ആരംഭത്തെ സൂചിപ്പിക്കുന്ന ഈ ചാന്ദ്ര പ്രതിഭാസം വ്യത്യസ്ത സംസ്കാരങ്ങളിൽ വ്യത്യസ്ത അർത്ഥങ്ങളോടെയാണ് ആഘോഷിക്കപ്പെടുന്നത്.

Mark your calendars! The mesmerizing Pink Moon will grace the night sky on April 12 at 8:22 PM. Despite its name, this full moon won't actually appear pink—the title comes from blooming spring flowers. Discover the cultural significance and best viewing tips for this celestial event that heralds the arrival of spring. A must-see for stargazers and nature lovers alike!