അമേരിക്കന്‍ ശതകോടീശ്വരനും പ്രസിഡന്റുമായ ഡൊണാള്‍ഡ് ട്രംപിന്റെ റിയല്‍ എസ്റ്റേറ്റ് സാമ്രാജ്യമായ ട്രംപ് ഓര്‍ഗനൈസേഷന്‍ ഇന്ത്യന്‍ വിപണിയില്‍ വന്‍ കുതിപ്പിന് ഒരുങ്ങുന്നു. ഇന്ത്യയിൽ വാണിജ്യ റിയല്‍ എസ്റ്റേറ്റ് പദ്ധതിയായ 'ട്രംപ് വേള്‍ഡ് സെന്റര്‍' പൂനെയില്‍ സ്ഥാപിക്കാനുള്ള പദ്ധതി കമ്പനി പ്രഖ്യാപിച്ചു. പൂനെ നഗരത്തില്‍ 2500 കോടി രൂപയുടെ മുതല്‍മുടക്കിൽ ട്രംപ് വേൾഡ് സെന്റർ എന്ന വാണിജ്യ കോംപ്ലക്സിന്റെ നിർമ്മാണമാണ് ലക്ഷ്യമിടുന്നത്.

ട്രംപ് ഓര്‍ഗനൈസേഷന്റെ ഇന്ത്യയിലെ പങ്കാളിയായ ട്രിബേക്ക ഡെവലപ്പേഴ്‌സും പൂനെ ആസ്ഥാനമായുള്ള കുന്ദന്‍ സ്‌പേസസും ചേര്‍ന്നാണ് പദ്ധതി നടപ്പാക്കുന്നത്. പൂനെയിലെ കോര്‍ഗാവ് പാര്‍ക്ക് പ്രദേശത്ത് 4.3 ഏക്കര്‍ സ്ഥലത്ത് നിര്‍മിക്കുന്ന ഈ സംരംഭം 16 ലക്ഷം ചതുരശ്ര അടി വിസ്തീര്‍ണമുള്ളതായിരിക്കും. രണ്ട് 27 നിലകളുള്ള ഗ്ലാസ് ടവറുകളാണ് പദ്ധതിയുടെ പ്രധാന ആകര്‍ഷണം. ഒരു ടവര്‍ ചെറുകിട ഓഫീസ് സ്ഥലങ്ങള്‍ക്കായി വില്‍പനയ്ക്ക് വയ്ക്കും, വലിയ ഓഫീസ് സ്ഥലങ്ങള്‍ വാടകയ്ക്ക് നല്‍കാനാണ് ഉദ്ദേശിക്കുന്നത്. 

കൂടാതെ, പദ്ധതിയില്‍ ഉയര്‍ന്ന നിലവാരമുള്ള റീട്ടെയില്‍ ബൊളിവാര്‍ഡും ഇന്ത്യയിലെ ആദ്യ ട്രംപ് ക്ലബ്ബും ഉള്‍പ്പെടും. 40,000 ചതുരശ്ര അടി വിസ്തീര്‍ണമുള്ള ക്ലബ്ബ് വ്യവസായ പ്രമുഖര്‍ക്ക് ഒത്തുചേരാനും ബിസിനസ് ചര്‍ച്ചകള്‍ നടത്താനുമുള്ള ഒരു പ്രത്യേക ഇടമായിരിക്കും. 2029-ഓടെ പദ്ധതി പൂര്‍ത്തിയാകുമെന്നാണ് പ്രതീക്ഷിക്കുന്നത്.

ഇന്ത്യയിലെ ട്രംപിന്റെ സാന്നിധ്യം

കഴിഞ്ഞ ഒരു ദശകത്തിനിടെ ഇന്ത്യ ട്രംപ് ബ്രാന്‍ഡിന്റെ ഏറ്റവും വലിയ വിപണിയായി മാറിയിട്ടുണ്ട്. നിലവില്‍ മുംബൈ, പൂനെ, ഗുരുഗ്രാം, കൊല്‍ക്കത്ത എന്നിവിടങ്ങളില്‍ ട്രംപ് ബ്രാന്‍ഡഡ് റെസിഡന്‍ഷ്യല്‍ പദ്ധതികള്‍ പ്രവര്‍ത്തിക്കുന്നുണ്ട്. എങ്കിൽ, വാണിജ്യ റിയല്‍ എസ്റ്റേറ്റ് മേഖലയിലേക്കുള്ള പുതിയ ചുവടുവയ്പ് ട്രംപ് ഓര്‍ഗനൈസേഷന്റെ ഇന്ത്യയിലെ സാന്നിധ്യം കൂടുതല്‍ ശക്തമാക്കുമെന്നാണ് പ്രതീക്ഷിക്കുന്നത്. 

"ഇന്ത്യ ട്രംപ് ബ്രാന്‍ഡിനെ അത്ഭുതകരമായി സ്വീകരിച്ചിരിക്കുന്നു. ഞങ്ങളുടെ ആദ്യ വാണിജ്യ പദ്ധതി ഇവിടെ ആരംഭിക്കുന്നതില്‍ അഭിമാനമുണ്ട്. ട്രംപ് വേള്‍ഡ് സെന്റര്‍ പൂനെ ലോകോത്തര നിലവാരത്തിന്റെ പുതിയ മാനദണ്ഡം സൃഷ്ടിക്കും." ട്രംപ് ഓര്‍ഗനൈസേഷന്റെ എക്‌സിക്യൂട്ടീവ് വൈസ് പ്രസിഡന്റ് എറിക് ട്രംപ് വ്യക്തമാക്കി