തേഞ്ഞിപ്പലം: കാലിക്കറ്റ് സർവകലാശാലയിൽ കഴിഞ്ഞ ആറു വർഷത്തിനിടയിൽ 89 വ്യാജ സർട്ടിഫിക്കറ്റുകൾ കണ്ടെത്തിയിട്ടും പ്രതികളെ കണ്ടെത്താൻ പൊലിസ് ആവശ്യപ്പെട്ട രേഖകൾ നൽകാൻ സാധിക്കാതെ സർവകലാശാല. 
അതുകൊണ്ടുതന്നെ കേസുകളിൽ കൃത്യമായ അന്വേഷണം നടത്താനോ പ്രതികളെ ചോദ്യം ചെയ്ത് നടപടിയെടുക്കാനോ പൊലിസിനു സാധിച്ചിട്ടില്ല.

ജന്യൂനസ് വെരിഫിക്കേഷൻ, ഒഫീഷ്യൽ ട്രാൻസ്ക്രിപ്റ്റ് എന്നിവയ്ക്കായി ഓൺലൈനായോ മാന്വലായോ 2018 ജനുവരി ഒന്നു മുതൽ 2025 ഫെബ്രുവരി 18 വരെ സർവകലാശാലയിൽ ലഭിച്ച അപേക്ഷകളുടെ കൂടെ സമർപ്പിച്ച  സർട്ടിഫിക്കറ്റുകളിൽ നിന്നും മാർക് ലിസ്റ്റുകളിൽ നിന്നുമാണ്  വ്യാജന്മാരെ പിടിച്ചത്. വ്യാജ സർട്ടിഫിക്കറ്റുകളെ പറ്റി പൊലിസിന് റിപ്പോർട്ട് ചെയ്തിട്ടുണ്ടെങ്കിലും ഏതെല്ലാം പരാതികളിൽ എഫ്.ഐ.ആർ രജിസ്റ്റർ ചെയ്തിട്ടുണ്ടെന്നതിന് സർവകലാശാലയ്ക്ക് മറുപടി ലഭിച്ചിട്ടില്ലാത്തതിനാൽ ഒരു പരാതിയിലും കേസെടുത്തിട്ടില്ലെന്നാണ് വ്യക്തമാകുന്നത്. 

വെരിഫിക്കേഷനായി വ്യാജ രേഖകൾ കൂടുതലായി സമർപ്പിക്കപ്പെടുന്നത് വിദേശ ഏജൻസികളുടെ മേൽവിലാസത്തിലാണ്. പലപ്പോഴും ഈ സർട്ടിഫിക്കറ്റുകളിൽ രേഖപ്പെടുത്തിയിട്ടുള്ള രജിസ്റ്റർ നമ്പറുകൾ യഥാർഥത്തിൽ ഉള്ളവയല്ല. അതിനാൽ തന്നെ വ്യാജ സർട്ടിഫിക്കറ്റുകൾ സമർപ്പിച്ച വ്യക്തികളെ തിരിച്ചറിയാൻ കഴിയുന്നില്ല. കൃത്യമായ മേൽവിലാസം പോലും സർവകലാശാല നൽകാത്തതാണ് പൊലിസ് പ്രതികളെ കണ്ടെത്താൻ കഴിയാതെ കൈമലർത്തുന്നതിനു കാരണം. ഇക്കാരണത്താൽ, നടപടികൾ കൈക്കൊള്ളുന്നതിൽ പ്രയാസം നേരിടുന്നതായി പൊലിസ് സർവകലാശാലയെ അറിയിച്ചിട്ടുണ്ട്.