ദുബായ്: ഏകദിനത്തിൽ പുതിയ നാഴികക്കല്ല് സ്വന്തമാക്കി ഇന്ത്യൻ വിക്കറ്റ് കീപ്പർ കെഎൽ രാഹുൽ. ഏകദിനത്തിൽ 3000 റൺസ് പൂർത്തിയാക്കാനാണ് രാഹുലിന് സാധിച്ചത്. ഈ നേട്ടത്തിന് മറ്റൊരു പ്രത്യേക കൂടിയുണ്ട്. ഏറ്റവും വേഗത്തിൽ 3000 ഏകദിന റൺസ് സ്വന്തമാക്കുന്ന മൂന്നാമത്തെ താരം കൂടിയാണ് രാഹുൽ. 78 ഇന്നിങ്സിൽ നിന്നുമാണ്‌ രാഹുൽ 3000 റൺസ് പൂർത്തിയാക്കിയത്.

79 ഇന്നിങ്സുകളിൽ നിന്നും ഈ നേട്ടം സ്വന്തമാക്കിയ മുൻ ഇന്ത്യൻ താരം നവജ്യോത് സിങ് സിദ്ധുവിനെ മറികടന്നാണ് രാഹുൽ മൂന്നാം സ്ഥാനം സ്വന്തമാക്കിയത്. 75 ഇന്നിങ്സിൽ നിന്നും ഈ നേട്ടത്തിൽ എത്തിയ വിരാട് കോഹ്‌ലിയാണ് പട്ടികയിൽ രണ്ടാം സ്ഥാനത്തുള്ളത്. 72 ഇന്നിങ്സിൽ നിന്നും ഈ നേട്ടം സ്വന്തമാക്കിയ മുൻ ഇന്ത്യൻ ഓപ്പണർ ശിഖർ ധവാനാണ് ഈ നേട്ടത്തിൽ ഒന്നാം സ്ഥാനത്തുള്ളത്.

ഓസ്ട്രേലിയക്കെതിരായ സെമി ഫൈനലിൽ 34 പന്തിൽ പുറത്താവാതെ 42 റൺസാണ് രാഹുൽ നേടിയത്. രണ്ട് വീതം ഫോറുകളും സിക്സുമാണ്‌ താരം നേടിയത്. അവസാനം സിക്സർ നേടി ഇന്ത്യയെ വിജയത്തിലേക്ക് നയിച്ചതും രാഹുൽ തന്നെയാണ്. വിരാട് കോഹ്‌ലി അർദ്ധ സെഞ്ച്വറി നേടി തകർപ്പൻ പ്രകടനമാണ് നടത്തിയത്. 98 പന്തിൽ അഞ്ചു ഫോറുകൾ ഉൾപ്പടെ 84 റൺസാണ് കോഹ്‌ലി നേടിയത്.ശ്രേയസ് അയ്യർ 62 പന്തിൽ 45 റൺസും കെഎൽ രാഹുൽ 34 പന്തിൽ 42 റൺസും നേടി വിജയത്തിൽ നിർണായകമായി. ഹർദിക് പാണ്ഡ്യ, രോഹിത് ശർമ്മ എന്നിവർ 28 റൺസും അക്‌സർ പട്ടേൽ 27 റൺസും നേടി. 

അതേസമയം ദുബായ് ഇന്റർനാഷണൽ സ്റ്റേഡിയത്തിൽ നടന്ന മത്സരത്തിൽ ആദ്യം ബാറ്റ് ചെയ്ത ഓസ്ട്രേലിയ 49.3 ഓവറിൽ 264 റൺസിന്‌ പുറത്താവുകയായിരുന്നു. വിജയലക്ഷ്യം പിന്തുടർന്നിറങ്ങിയ ഇന്ത്യ നാല് വിക്കറ്റ് ബാക്കിനിൽക്കെ ലക്ഷ്യം മറികടക്കുകയായിരുന്നു. ടൂർണമെന്റിൽ ഒരു മത്സരം പോലും പരാജയപ്പെടാതെയാണ് ഇന്ത്യ ഫൈനൽ യോഗ്യത നേടിയത്. ഗ്രൂപ്പ് ഘട്ടത്തിൽ ബംഗ്ലാദേശ്, പാകിസ്താൻ, ന്യൂസിലാൻഡ് എന്നീ ടീമുകളെയാണ് ഇന്ത്യ പരാജയപ്പെടുത്തിയിരുന്നത്. നാളെ നടക്കുന്ന രണ്ടാം സെമിയിൽ സൗത്ത് ആഫ്രിക്കയും ന്യൂസിലാൻഡുമാണ് ഏറ്റുമുട്ടുന്നത്. മാർച്ച് ഒമ്പതിനാണ് ടൂർണമെന്റിന്റെ ഫൈനൽ മത്സരം നടക്കുന്നത്.