കുവൈത്ത് സിറ്റി: "ഖലീജി സെയിൻ 26" ചാമ്പ്യൻഷിപ്പിന്റെ അഭൂതപൂർവമായ വിജയത്തിവും കുവൈത്തിലെ ടൂറിസത്തിൽ അത് ചെലുത്തിയ സ്വാധീനവും കണക്കിലെടുത്ത് ട്രാൻസിറ്റ് വിസ അനുവദിക്കാനൊരുങ്ങി കുവൈത്ത്. കുറഞ്ഞ ദിവസത്തേക്ക് രാജ്യത്തേക്ക് വരാൻ ആ​ഗ്രഹിക്കുന്നവർക്കാണ് ട്രാൻസിറ്റ് വിസ നൽകാൻ ആലോചിക്കുന്നത്. 
 
കുവൈത്തിലെ ദേശീയ വിമാനക്കമ്പനികൾ വഴി മാത്രമേ ഈ വിസകൾ ഏകോപിപ്പിക്കുകയുള്ളൂവെന്നും സന്ദർശകർ കുവൈത്തിൽ എത്തുന്നതിനുമുമ്പ് വിസയ്ക്ക് അപേക്ഷിക്കുകയും നേടുകയും ചെയ്യണമെന്ന് അധികൃതർ വിശദീകരിച്ചു. ഈ വിസകൾ പുതുക്കാൻ കഴിയില്ല. യൂറോപ്പിനും ഏഷ്യയ്ക്കും ഇടയിലുള്ള ആഗോള ട്രാൻസിറ്റ് വിമാനങ്ങളുടെ ഒരു പ്രധാന കേന്ദ്രമെന്ന നിലയിൽ കുവൈത്ത് അന്താരാഷ്ട്ര വിമാനത്താവളത്തിൽ ടെർമിനൽ 2 തുറന്നതിനുശേഷം, രണ്ട് ഭൂഖണ്ഡങ്ങൾക്കിടയിൽ കടന്നുപോകുന്ന ധാരാളം യാത്രക്കാർ കുവൈത്ത് സന്ദർശിക്കാൻ താൽപ്പര്യപ്പെടുന്നുണ്ട്.

യൂറോപ്പിൽ നിന്നും മറ്റു ഏഷ്യൻ രാജ്യങ്ങളിൽ നിന്നുമുള്ള യാത്രക്കാർ കുവൈത്തിലൂടെ സഞ്ചരിക്കുന്നുണ്ടെങ്കിലും ഇവരിൽ കുവൈത്ത് വിസയില്ലാത്തവർക്ക് വിമാനത്താവളത്തിൽ നിന്ന് പുറത്തിറങ്ങാൻ അനുവാദമില്ല. പുതിയ ട്രാൻസിറ്റ് വിസയിലൂടെ, ഈ പ്രശ്നത്തിന് പരിഹാരം കാണാൻ കഴിയുമെന്നാണ് പ്രതീക്ഷിക്കുന്നത്.

Gulf Cup Boosts Tourism; Kuwait to Launch Transit Visas