തിരുവനന്തപുരം: നീതി തേടി സമരത്തിനിറങ്ങിയ ആശാവര്‍ക്കര്‍മാരോട് പൊലിസിന്റെ ക്രൂരത. നനയാതിരിക്കാന്‍ കെട്ടിയ ടാര്‍പോളിന്‍ ഷീറ്റ് അഴിപ്പിച്ച് ആശാവര്‍ക്കര്‍മാരെ പെരുമഴയത്ത് നിര്‍ത്തി. ഉറങ്ങികിടന്ന ആശ വര്‍ക്കര്‍മാരെ കൊണ്ട് തന്നെയാണ് മഴ നനയാതിരിക്കാന്‍ അവര്‍ കെട്ടിയ ടാര്‍പോളിന്‍ ഷീറ്റ് പൊലിസ് അഴിപ്പിച്ചത്. 

പുലര്‍ച്ചെ മൂന്നു മണിയോടെ മഴ പെയ്ത സമയത്താണ് ഉറങ്ങികിടന്ന ആശ വര്‍ക്കര്‍മാരെ വിളിച്ചുണര്‍ത്തി പൊലിസ് ഷീറ്റ് അഴിപ്പിച്ചത്. പൊലിസ് എത്തിയപ്പോള്‍ ടാര്‍പോളിന്‍ ഷീറ്റിന് താഴെ പായ വിരിച്ച് ഉറങ്ങുകയായിരുന്നു ആശ വര്‍ക്കര്‍മാര്‍. എന്നാല്‍ മഴ നനഞ്ഞാണെങ്കിലും സമരം തുടരാന്‍ തന്നെയായിരുന്നു അവരുടെ തീരുമാനം. 

സെക്രട്ടേറിയറ്റിന് മുന്നിലെ ആശ വര്‍ക്കര്‍മാരുടെ അനിശ്ചിതകാല രാപകല്‍ സമരം 21 ദിവസം പിന്നിടുകയാണ്. സമരം ശക്തിപ്പെടുത്താനാണ് സമരസമിതിയുടെ തീരുമാനം. വേതനം അടക്കമുള്ള ആവശ്യങ്ങള്‍ ചൂണ്ടിക്കാട്ടി ആശ വര്‍ക്കര്‍മാര്‍ തിങ്കളാഴ്ച നിയമസഭയിലേക്ക് മാര്‍ച്ച് നടത്തുന്നുണ്ട്.