ദോഹ: വിശുദ്ധ റമദാന്‍ മാസത്തിലെ 'സിംഗിള്‍ വിന്‍ഡോ' സേവനങ്ങളുടെ ഔദ്യോഗിക പ്രവൃത്തി സമയം ഖത്തര്‍ വാണിജ്യ വ്യവസായ മന്ത്രാലയം (എംഒസിഐ) പ്രഖ്യാപിച്ചു.

രാവിലെയുള്ള ഷിഫ്റ്റ് രാവിലെ 9:00 മുതല്‍ ഉച്ചയ്ക്ക് 1:00 വരെയും, വൈകുന്നേരത്തെ ഷിഫ്റ്റ് ഉച്ചയ്ക്ക് 1:00 മുതല്‍ 3:30 വരെയും ആയിരിക്കും. റമദാനിന്റെ തനതായ സ്വഭാവം ഉള്‍ക്കൊള്ളുന്ന രീതിയില്‍ കാര്യക്ഷമമായ സേവന വിതരണം ഉറപ്പാക്കുന്നതിനും പ്രവര്‍ത്തന പ്രക്രിയ സുഗമമാക്കുന്നതിനുമുള്ള മന്ത്രാലയത്തിന്റെ പ്രതിബദ്ധതയെ മുന്‍നിര്‍ത്തിയാണ് ഷെഡ്യൂള്‍ പുതുക്കിയിരിക്കുന്നത്. ഫെബ്രുവരി ആദ്യം ഞായറാഴ്ച മുതല്‍ വ്യാഴാഴ്ച വരെ ഉച്ചയ്ക്ക് 2:00 മുതല്‍ വൈകുന്നേരം 6:00 വരെ സേവനങ്ങള്‍ വാഗ്ദാനം ചെയ്തുകൊണ്ട് സേവന സമയം വിപുലീകരിച്ചതായി മന്ത്രാലയം പറഞ്ഞിരുന്നു.

പരമ്പരാഗത പ്രവൃത്തി സമയത്തിന് പുറത്ത് ഇടപാടുകള്‍ പൂര്‍ത്തിയാക്കാന്‍ ഉപഭോക്താക്കള്‍ക്ക് അവസരം നല്‍കുന്നതിനും, അതുവഴി സേവന കേന്ദ്രങ്ങളിലെ തിരക്ക് കുറയ്ക്കുന്നതിനും, മൊത്തത്തിലുള്ള ഉപഭോക്തൃ അനുഭവം മെച്ചപ്പെടുത്തുന്നതിനുമാണ് ഷെഡ്യൂള്‍ പുതുക്കിയിരിക്കുന്നത്.

വൈകുന്നേര സേവനങ്ങള്‍ക്കായുള്ള വര്‍ധിച്ചുവരുന്ന ആവശ്യം മന്ത്രാലയം നേരത്തേ തന്നെ പരിഗണനയില്‍ എടുത്തിരുന്നു. ഇത് ഉപഭോക്തൃ പ്രതികരണത്തില്‍ നല്ലപോലെ പ്രതിഫലിച്ചിട്ടുമുണ്ട്. കഴിഞ്ഞ ആഴ്ചയില്‍ മാത്രം, 'സിംഗിള്‍ വിന്‍ഡോ' സേവനത്തില്‍ 850 സന്ദര്‍ശകരാണ് രജിസ്റ്റര്‍ ചെയ്തത്. അതില്‍ 150 പേരാണ് വൈകുന്നേര സമയം ഉപയോഗിച്ചത്.

ഖത്തര്‍ നാഷണല്‍ വിഷന്‍ 2030ന് അനുസൃതമായി സര്‍ക്കാര്‍ സേവനങ്ങള്‍ ആധുനികവല്‍ക്കരിക്കുന്നതിനും കാര്യക്ഷമമാക്കുന്നതിനുമുള്ള മന്ത്രാലയത്തിന്റെ വിശാല തന്ത്രത്തിന്റെ ഭാഗമാണ് ഈ സംരംഭം.

നടപടിക്രമ കാര്യക്ഷമത വര്‍ധിപ്പിക്കുന്നതിലൂടെയും കൂടുതല്‍ ഫ്‌ലെക്‌സിബിളായ സേവന ഓപ്ഷനുകള്‍ നല്‍കുന്നതിലൂടെയും ബിസിനസ് പ്രക്രിയകള്‍ ത്വരിതപ്പെടുത്തുക, നിക്ഷേപ പദ്ധതികളെ പിന്തുണയ്ക്കുക, കൂടുതല്‍ മെച്ചപ്പെട്ട ബിസിനസ് അന്തരീക്ഷം സൃഷ്ടിക്കുക എന്നിവയാണ് മന്ത്രാലയം ലക്ഷ്യമിടുന്നത്.

ഖത്തറിന്റെ ബിസിനസ് മേഖലയെ ശക്തിപ്പെടുത്തുന്നതിന് സഹായിക്കുന്ന 'സിംഗിള്‍ വിന്‍ഡോ' സേവനങ്ങള്‍ മെച്ചപ്പെടുത്തുന്നതിനും ഇടപാട് പ്രോസസ്സിംഗ് സമയം കുറയ്ക്കുന്നതിനും ഉപഭോക്തൃ സംതൃപ്തി വര്‍ധിപ്പിക്കുന്നതിനുമുള്ള പ്രതിബദ്ധതയും ബാധ്യതയും വാണിജ്യ വ്യവസായ മന്ത്രാലയം ആവര്‍ത്തിച്ച് വ്യക്തമാക്കി.

Qatar Ministry of Commerce and Industry Announces Working Hours for 'Single Window' Services During Ramadan